خصمكم فيْ الآخره! عبدالله المسعودي
 

السلام عليكم ورحمة اله وبركاته

إليكم هذه المحاوره الجميله والمُمتعه بين الشاعرين صياف الحربي(رحمهُ الله) ورشيد الزلامي:



رشيد
ياسلام اللْه سلام اللي خفيفٍ دمه
معه جنسيه ويبغا له جواز إسعودي

مشكلة صياف صارت بين ابوه وعَمه
والسبب ناسٍ تدق الملح والبارودي


صياف
مرحبا بالشاعر اللي ماقدرت اذمه
الليالي ماتغير والزمان يعودي

الزلامي معه علم وكل شي يهمه
مير لو يزعل تغيره الليال السودي


رشيد
كيف تدلي بالشهاده ياكبير الذمه
وانت ماشب لك ضوك غير قدح زنودي

صرت مثل اللي كبر وانكر لبن ديس امه
والعرب في الصيف تعرف عدها المارودي


صياف
العلوم اللي تحط الناس راس القمه
حبلها من يمكم ياصاحبي معقودي

ثوبك اللي ماينوش الارض غير بكمه
نزّله للجمره اللي فوق راس العودي


رشيد
ودي اكشف غلطتك للعالم الملتمه
انت حربياً تطالبني بورث جدودي

يامحبين العقال ومنكرين العمه
خصمكم في الآخره عبدالله المسعودي


صياف
انتم اِرجال الشرف وعظامكم منسَمَّه
اعبروا ذاك الطريق وحملكم مشدودي

انت ماتدري عن البارود لين تشمه
مير لاترمي بها في الوادي المسدودي


رشيد
لوّ ياصياف علمي تمسكه وتضمه
تاجده مثل العسل ولاّ حليب القودي

انت تحسب جدنا دابٍ يموت بسمه
مير انا باذل لنصره طاقتي وجهودي


صياف
يقطع الله ديرة اللي مايعرف الجمه
والتجاره يالعتيبي بابها محدودي

قبرك اللي في تهامه بالتراب ندمه
تحفره بالليل الاظلم والعباد رقودي

وسلامتكم

الله الله الله

من زمان وانا ابحث عنها يا ابو هاني

لا هنت لا هنت

والحقيقه انها من المحاورات والقويه والعنيفه


تقديري !!


..

قبرك اللي في تهامه بالتراب ندمه
تحفره بالليل الاظلم والعباد رقودي


الله المستعااااان ،،،،
هذا الكلام كان في عهدهم الزاهر قبل مدري تسم عام ،
أجل هالحين كيف صارت الدعاوي ،؟؟؟؟

تسلم ياعبدالرزاق لاعدمناك ياعالي الذوق ،
ولانملك إلاّ الدعاء بالرحمه والمغفره لصياف ، والبقاء على الخير لبو جميل ،
لكي يقوم بنصرة جده كما ينبغي !
<- ياذاك اني اعرف المعنى :)


سلام’ عليكم

الله واكبر


رحم الله شاعر الخليج صياف السحيمي

محاوره قويه ولعب على اصول فقدنا الايام هذي مثل هذي الملعبه


لاهنت

رحم الله الشاعرين العمالقه ( المسعودي وصياف )

وحفظ الله رشيد الزلامي

عمالقه بكل ماتعنيه الكلمه من معنى

الله يرحم الشاعر صياف الحربي والشاعر المسعودي

وعزالله انها محاوره يستفاد منها كثير وكثير

والله يحفظ الشاعر رشيد الزلامي ويعطيه طولة العمر