بسم الله الرحمن الرحيم




السلام عليكم ورحمة الله وبركاته



نومك طرب وأنا بنومي هواجيـس

ما سهرك بالليل كثـر الهمومـي



أسهر أليا نامت عيون الهداريـس

بالليل أساهر ساريـات النجومـي



أونس بقلبي مثل صلي المحاميـس

الله يلـوم اللـي لحالـي يلومـي



قالوا جهلت وقلت جهلٍ بـلا قيـس

الجاهل اللي ما يعـرف اليمومـي



أشوف عـدلات الليالـي معابيـس

ولا احدٍ من الدنيا عظامه سلومـي



البني ما يصلح على غير تأسيـس

ومن لا تعلّم مـا تسـر العلومِـي



ولا خير في كثر الحكي وألتماليـس

وقولٍ بـلا فعـلٍ يجيبـه وهومِـي



وأليا ركبت معالجـات المضاريـس

يبدأ على كبدي لهيـب السمومِـي



بــ الليل أصالي حاميـات المحاميـس

والصبح أصالي كل قبّـا وكومـي



واقفن بنا مثل النعـام المماريـس

ليا خف عجلٍ مع رفيع الحزومِـي



نستلحق اللي يطلبـون النواميـس

اللي مع الاقصين وادنـا اللحومـي



ولومي على اللي ينقلون العبابيـس

صنع الفرنج وكل رامـي لحومـي



وشلف ٍ تركّب بالرماح المناسيـس

وسلت المهار وكـل قبّـا قحومـي



والعز فوق معسكرات السواديـس

اليا قصدت اللي بالاشيـا رحومـيِ



قـب ٍ تنـازا بالنشامـا كراديـس

والطيـر فـي روجاتهنّـه يحـوم ِ



إن جن بالميدان مثـل الدواويـس

وتعاقبوا مـن فوقهـن السهومـي



عرج باهلهـن كنهـنّ القرانيـس

على الطريح مصوبرات ٍ كظومـي



حتى يزين لنـا المثـل والتوانيـس

والكيف طاب لمن يفـكّ القحومـي



ومن لا يقلّط شذرة السيف والكيس

يصبح عليه مـن الليالـي ثلومـي



ومن لا خذا الدنيا بميـز ٍ وتقييـس

مثل الذي يسبـح ببحـر ٍ يعومـي



كلّ القلم مـن كتبنـا بالقراطيـس

والخيل من كثـر الدلاليـج تومـي



وشيخ ٍ لنا يعطى الفقارا المفاليـس

عسـاه بالدنيـا بعـز ٍ يـدومـي



حر ٍ ليـا دبّـت عليـه النواميـس

اليا اعترض جول الحباري صرومي



أليا أكترب من بعض الأشيا سبابيس

أعـزم ولا بـد الفـرج للعزومـي



ثوب الفرح لبسك نظيف الملابيـس

إن قيل بأيـام الكـرب والزحومـي



واعمل وتلقى وافهم العلم بالقيـس

ودنياك لو زانـت تراهـا نقومـي



تضحك وتخفي لك خفي الهناديـس

تفطر لنا يـوم ٍ ويـوم ٍ تصومـي



أربع سنين ودمع عينـي أماريـس

العين تسهر كـن فيهـا هزومـي



يجلي صدا قلبي ضبيح المهاريـس

ليا جاك شرّاب الحشايش يعومـي



ودلال فوق النـار دايـم محابيـس

إكرامهـن حـق ٍ علينـا لزومـي



من صنعة الصبّة وخمس ٍ تخاميس

وبريّة ٍ تعمـل بهـن كـل يومـيِ



وابهارهـا عشـر ٍ بليـا دنافيـس

كيـف ٍ يعـدّا للنشامـا القرومـي



عدّه لحمّـاي الجيـاد المراويـس

والا الحصان اللي بقينـه وهومـيِ



وصلوا على سيد البريـة بتدريـس

صفوة قريش اللي مشى باليمومـي



عدّ النبات وعّـد ذاري الطعاميـس

واعداد ما يمطر سحـاب الغيومـي



لــ تركي بن حميد