[poem=font="Simplified Arabic,5,black,normal,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]

على الله والدنيا تجاريب ودروس = والأقدار تجري كل صبح ومسيّه

مقادير ماهي تعرف ظلال وشموس = تحط الهقاوي بين شمسً وفيّه

تحتحت ورق الأشجار وتجفف رسوس = وتغرق بعيد الشوح وسط الركيّه

أقوله بعد ماقستها كلها قـوس = وقرّبت هذيـّه وبعـّـدت ذيـّه

وكم مرّةً هوجست ماعندي هجوس = على شان يرضى كل طيّب سجيّه

ولاهمني المسحوب لو صار منكوس = ولا طاح عندي شايل السامريّه

ومن قال هذا اللي تشوفون ملبوس = وعنده مع المارد علاقه قويّه

فلا بألتفت في بربسة كل بربوس = بليّه وفعلاً ذيّ شرّ البليّه

أهندب وأنا ماني من الجن ممسوس = ونار القريحه كل الأوقات حيّه

ولكن بعض الأحيان يلحقني حسوس = تخليني أبلش بين هَـيّه وهَـيّه

هنا جرة الطاروق ما تبري القوس = وهنا الهندبه معدومة القابليّه

وذا اليوم بالتحديد سيده ومعكوس = بعد ما جرالي قصةٍ عالميّه

مع عاملً يلبس على الراس كبوس = وبنقالي المنشا وهندي الهويّه

لكيعً وضيعً بالريالات مهووس = وعلى النصب والتدليس نفسه جريّه

تقاولت أنا وإياه وآخوه قدّوس = وثلاث سْنوات وكلّ ذمـّه بريّه

أسمّن له البخشيش ظاهر ومدسوس = وعلى ما أتفقنا ما نقصت العطيّه

هذا يوم كان الدرب بالعقل مقيوس = وقبل آتورّط في نقيّ ونقيّـه

ومن يوم مسّكت الجمل خط جاموس = وأنا عارفً إنـْها روحةٍ دون جيّه

إلى جيت أعدّل وضعها حستها حوس = وتالي نتاج أزماتي المصرفيّه

مع العامل المذكور والعلم محسوس = عطيته حسابه ما عطيته هديّه

تلفت تلفاتة شـموتً ومديوس = وتمتم نفر كنجوس وأشــّر عليّه

ومن أدوّر لي مترجم وقاموس = عرفت إيش معنى كلمته الأجنبيّه

أنا يامحمد خان ماني بكنجوس = ولكن ظروفي يا محمد رديه

بغيت المراجل لكن الحظ منحوس = وعلى ما أعتقد نحاسته سرمديّه

إذا قلت قم ياحظ والطيب مغروس = تجي قومته مع وجهة الجاذبيّه

ولاهو من الخزرج ولا هو من الأوس = تقول إن مشكلتي معه مذهبيّه

لذلك مشيت ودست درب الخطر دوس = ولا فيه شيً يرفع المعنويّه

نثرت الورق والاّ الورق كان مدبوس = وذبحت النظام بخنجر الفوضويّه

جبلّة نقا ماهي سياسات سايـوس = آثارِ النقا في الوقت هذا خطيّه

زمنـّا زمان ذيول ماهو زمن روس = كسر ريشة الشيهان ذيل الحديّه

ومدّ اللحم للفاغر اللي بلا ضروس = وكم فاغرً قامت تدارج لحيــّه

وضاعو النشامى بين طليان وتيوس = تقول إن هذا فصل من مسرحيّه

وفيه البطل شاهد وقاضي وجاسوس = ولا به قضيّه بس جابو قضيّه

مادام إن روس أموالنا كروة تكوس = فداك الورق يالعملة المعدنيّه !

يموت المقصّ اللي تبع جرة الموس = ولو عاش مدري عن نوايا خويّه

كذا يا محمد بانت جبال وطعوس = وهبّت رياحً ماهي بموسميـّه

لحس ملعقة مذخورنا كل ملحوس = وعريف الفصيل أصبح يقود السريّه

(سلامات يا قطوً على الخط مدعوس ) = بغو ينقذونه قال دقـو تحيـّه

لو إن ربيّ أعطاني عمارات وفلوس = عطيتك عطاً ماقد حصل لك حليّه

ولكن ترى المسرى على ضوح فانوس = توكل على الله وإنص نجد العذيّه

وفيها تبي تلقى ديـنــّات وجمـوس = مصافيط حول عمارة الفيصليـّه

يبادونك الثنتين دبـسا ودبـّوس = يا سرج العبيّه يا شداد المطيـّه

بتدري بعدها إن أكثر الشعب كنجوس = وكلّه من أسباب الظروف الرديّه !



[/poem]