يا شكواي لله منك يـا الطـاري المقـدام
تقدّمت وهجوسي عـن البـثّ محجوبـه
علامك تورّدني علـى مصـدر الإلهـام
ما خليّتني تايب .. وأنـا معلـن التوبـه
يقول الوعد وينه .. وأقول الوعـد قـدام
تخاويـت مـع شفّـه ولبيّـت مطلوبـه
لا جيت أقفل البيبـان وأنكّـس الأعـلام
زهمني وأنا جايز عن الشعـر ودروبـه
عسى الله يعين الحبر والصحف والأقـلام
على كلّ موهوب .. وعلى كلّ موهوبـه
يدور الفلـك ويلـفّ وتذعـذع الأنسـام
و تمضي بما فيها والأعمـار محسوبـه
ومن حسبة الحسّاب باقـي ثمـان أيـام
ويهلّ الهـلال ويلفـت أنظارنـا صوبـه
على أفضل شهر وأزكى ليالي سلام إسلام
عسـى الله يجمّلنـا ونعطيـه ماجوبـه
أشوف الفضـاء قامـت قنواتـه النيّـام
توايق من كموم الفضاء وانفتـق ثوبـه
تحضّر لشهر الصـوم بمصـوّر الأفـلام
دراما خصوصيّه .. وصيّـه و مكتوبـه !
عروض ٍ تجيك من الخليج ومصر والشام
على شاشـة التلفـاز للنـاس مجلوبـه
تهلّ وتبثّ وبثّهـا حصـري مـن العـام
مسلسل حلقاته على الشهـر مصبوبـه
كذا يستغلـون إسمـه ومحتـواه الهـام
علشان من ينتج عمـل تكبـر جنوبـه !
على كل شاشه طفـرة ٍ تكسـر الأرقـام
و للّهـو كـل ٍ قـام يدعيـك منـدوبـه
ما كنّه شهر رحمـه وغفـران للصيّـام
وعتق ٍ من اللي لأقرد الخلـق مشبوبـه
يا مسلم حماك الله مـن الذنـب والآثـام
ترا غفلة المسلم تضاعـف لـه ذنوبـه
وصلك الشهر وإليا بلغتـه وحظـك قـام
عيونك على التلفـاز ماهيـب مغصوبـه
أخذ من كتاب الله .. لا تآخذ من الأوهـام
ما يضمن نجاتك وأكثر الناس منكوبـه !
سداح والله اني معجب ومحب لك ولشعرك الى النخاع
ولكن والله انك فوق كل اطراء وكل تعليق
عسا الله يبلغك رمضان وجعلك ممن يصومه ويقومه احتساب
|