،
يا مرحبا ملاييييييين يأبو يحيى
يارب عفوك قبل لا أخطي ولا آصيب
وآقـدّم دقاقـي وآقــدّم جـلالـي
هذا ولا لي غيـر عفـوك مطاليـب
وبيـدك ياربّـي وقفتـي وإنتقـالـي
عليّ بـذل الجايـز مـن التسابيـب
وعليـك يـاربّ العـبـاد إتكـالـي
مشيت في بـرد وعجـاج ولواهيـب
شيً تعكّر لـي وشـيً صفـى لـي
كذا حياتي عفـس مـن دون ترتيـب
خليـط بيـن الواقعـي والخيالـي !
أحيان أطـوّع عاصيـات الهناديـب
وأحيان هندابـي علـى قـد حالـي
واليوم ماهندبـت أسجّـل تجاريـب
الموقف أكبر مـن لحـون وملالـي
فيه أرتجلت الحزن معنـى وتركيـب
قـدّام أترجمهـا بقـاف إرتجـالـي
حدّي خفوقي يالضلـوع المحاديـب
العلـم عـدّا طاقـتـي وإحتمـالـي
ما هو بعيبً لو غزى راسي الشيـب
(العيب زرع الهيّنـه عنـد غالـي)!
الله يجنّبنـي هـل العيـب والعيـب
والله يجمّلنـي ليـا جــا مجـالـي
أغيب بعض أحيان وأحيان ماآغيـب
حسب الظروف وراحتي وإنشغالـي
مرّات أعشي من عشا ليلـي الذيـب
ومرّات ما ألقى لي عشاً من حلالي !
بعض الليالي لا منـادي ولا مجيـب
ومنـاديً ومجيـب بعـض الليالـي
الوقـت هـذا فـرّ كـل الدواليـب
ومن كان الأوّل حطّه الوقـت تالـي
وطّى مقام الكفو عطْب المضاريـب
والهيس حطّه فوق صاحـب معالـي
تسيّـد الهافـي كبـيـر اللغابـيـب
وتقيّـد الوافـي حميـد الخصالـي !
حتى بقايا الناس صـارو مناصيـب
وروس الرجال يجمّعـون الخوالـي
والحـدب خلاّهـا بليّـا مقاضـيـب
تعالـي وروحـي وروحـي تعالـي
إيهيب يا ذا الوقت وإيهيـب وإيهيـب
أنت السبب فـي ضيقتـي وإنفعالـي
عذربـت رجّـالً بليّـا عـذاريـب
أستغفر الله صار منظـر جمالـي !
لكن ومـن مبـدا سـلام وتراحيـب
قبـل الغروبـي يختلـط بالزوالـي
نقل البنادق غيـر نقـل المشاعيـب
يا ساحب المسحـوب هـلّ الهلالـي
هذا زمان اللعب وإلعـب يـا لعّيـب
وإحذر تـرى الأيـام مـرًّ وحالـي
ثلاثة أرباع الوطـن لـك معازيـب
وربعً بقـى خالـي ولاهـو بخالـي
العام شفهـا بيـن جمـران ومغيـب
واليـوم بيـن البيـج والبرتقالـي !!
الله الله الله الله الله الله
والله أنها ذهب صااااااااااااااااااافي يابو يحيى ، صح الله السانك مدد يالشيخ
،
|