[poem=font="Traditional Arabic,5,black,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]
عايش على كيفي .. واجي واروح = الله عطاني .. نظرةٍ حادّه
امزج من الممنوع والمسموح = واستخرج .. السُخريّه الجادّه
ماني مسكّر بابي .. المفتوح = لو اكثر وجيه العرب .. صادّه
انا قنعت بما كِتب فاللوح = واللي كِتب لي .. ماني برادّه
قلبي كبير .. وخاطري مجروح = والجرح .. من سكيني الحادّه
لا شفت وِجهة .. دربي المبروح = لقيت حظّي واقف .. وسادّه
ولو لا بقايا صوتي المبحوح = دخّلت راسي .. فاقرب مشادّه
مدري انا من خِلقتي .. مشفوح = والا عديم .. وماسك الجادّه
وش هو له استفتي .. بعيد الشوح = والوقت اعرفه .. والعمر عادّه
ما يِخرج العزه .. من اقصى الروح = الا الجشع .. والذل .. والمادّه!
[/poem]