[poem=font="Simplified Arabic,5,black,bold,normal" bkcolor="transparent" bkimage="" border="none,4,gray" type=2 line=1 align=center use=ex num="0,black""]
واهني ّ اللي ضميره مستريح ولا تعنّا=ما يحطّه بين دورات الزمان ولا يشيله

يصبح ويمسي .. ويلقى في حياته ما تمنّا=تحته الفرشه حرير .. وفوقه الفيّه ظليله

والله أنّي يوم أميّز وأتفكّر في زمنّا=كثروا أصحاب الفضول .. وقلوّا أصحاب الفضيله

التطوّر يوم جاب التقنيه منّا ومنّا = ولّعتنا لين سلّمنا على خشم الفتيله

وشبكة النتّ الكبيره عقب حلّت في وطنّا=عنكبتنا من فصيله في فصيله في فصيله

نجتمع في الشاشه اللي نورها الساطع فتنّا=وطاولتنا مستديره والكراسي مستطيله

أبتدت غزوات الانتر .. وأنتهت غزوة مهنّا=ما نريد الغزو الاول عقب ورّدنا بديله

يوتيوب .. وفوتوشوب .. وفيس بوك .. و يا الله إنّا=في رجاك وفي حجاك عن الفضيحه والفشيله

القبيلي يوم شمّر عن ذراعه قال حنّا=من زحول العولمه لو يذبح سلوم القبيله

قفّل الغرفه عليه ودردش وفرفش وغنّا=وقام يرقص للعلوم الخاثره ويشدّ حيله

شيبت في نصف راسه .. صورة الكف المحنّا=وشيبّت في النصف الآخر صورة العين الكحيله

من برب .. لباك ولكم .. شامنا صافح يمنّا=هكذا عاش التواصل بيننا بأهون وسيله

يا محرّف بالحقايق لا تردّ العلم عنّا=يوم قلت الذيب عوّد يومي براسه وذيله

نتبرّا من بلانا .. والبلا فينا ومنّا=ونتذرّا في خطانا .. والخطا نخلي سبيله !
[/poem]



وسلمتوا ،،