الضيقه اللي تنتظر ليلـه السبـت
تاخذ حساب اسبوعها كل ماجـات
لاحضّرت هليـت فيهـا ورحبـت
ترحيبةٍ تبدي على غيـر مشهـات
لو كان لي مجناب من عصر جنبت
وهجيت مع جرد الفجوج الوسيعات
رضيت والا ضاق صدري وعصبت
مجبور اقضي ليلتـي بالمعانـات
اتعوذ من ابليس لامـن تثاوبـت
واغمض عيوني وانا اقول هيهات
معها على كـل الجوانـب تقلبـت
وابحرت بافكاري بغـب المتاهـات
ترمي علـي حمولهـا ماتسببـت
اسبابها من عنـد رب السمـوات
في ليلها تشكي ضلوعي من الكبت
واقوم اصالي واهج الهم بسكـات
تصبح بذور همومها بالحشا نبـت
واصير احسب حسابها كل الاوقات
ازرع لها الفرحه من السبت للسبت
من شان تحصد فرحتي كل ماجات



الله الله

ياسلام عليك يبوعابد قصيد مليانه وكلها عاطفه وصدق مشاعر

صح لسانك

تحياتي