قلت آه من صبرٍ صبرته على الكود
ومن ونةٍ للقلب جاحت وقدّت
ونّة عتب ونّة غضب مالها حدود
يا ليتها عن مغلق الصدر صدّت
لو هي بحيدٍ ذوّبت كل جلمود
على الضماير بالهضايم تحدّت
قامت تعرّض لي بالأيّام والسود
إن قلت قفّت عوّدت لي وردّت
إن قلت هانت بالحشا جابت الزود
وجاحت خفايا ضامري واستجدّت
وزادت جروح القلب بجروح ولهود
ودنياي مالت عن سنعها ولدّت
والعين كن بنونها ملح بارود
على السهر كل الليالي تحدّت
تسهر وبعض الناس هِجاع ورقود
وهي تبي فرقاه ما فيه لدّت
ونشدت يا تركي عن اللي بهم جود
وقالوا ضعون أهل المروات مدّت
العدل من شدّو مع الناس مفقود
وبفعالهم عمسين الأريا تقدّت
منزالهم خالٍ تصافق به النود
من يوم عنه اسلاف الأجواد شدّت
أقفوا عن الدنيا هل الخيل والقود
اللي فضايلهم على الناس بدّت
هل الفعول ولبسهم صنع داوود
وهل المهار اللي على الضّد كدّت
عصمان الاريَا مشرعة كل مجرود
ليت الليالي السود عنهم تعدّت
الناس بالايّام طارد ومطرود
ياليتها بأهل المروه تحدّت
وطير الفلاح اللي عن الصيد مردود
عقبه تبوعٍ علّمت واستهدّت
أشوف ناسِ عندها الحقد ماجود
ونفوسهم عن كل عليا تردّت
العدل في ساحاتهم صار مفقود
وعن الفضيله جنّبت واستردّت
ما يرفعون النفس عن كل منقود
ان ما تعشّت عرضها له تغدّت
تعطى عن العليا محاريف وصدود
ووجيههم ما قيل بالجود ندّت
محمد السديري (ت 1400هـ) رحمه الله