السلام عليكم ورحمه الله وبركاته
مرثيه في والدي الله يرحمه ويسكنه فسيح جناته

اتصال ٍ شب في قلبي لواهيب ٍ قويّه
احرقت كل الظلوع الحدب واعروق المحاني

في صباح السبت قيل ابوك وافتـه المنيّه
المنيـّه جات مآنقـصـت ولا زادت ثواني

فاضت النفس الزكيّه يم خلاّق البريّه
يومه المحتـوم في دنيـا الفنا والعمر فاني

شِلّـت اطرافي ولالي بالتّحرّك مقدريّه
مير ربـي نزّل الرحمه عليّه واحتمـاني

رحت اشوفه والدموع انهار من عين ٍ شقيّه
كل عرق ٍ من عروق الجسم من حزنه يعاني

من رحيله ضاق صدري مابقى لحالي بقيّه
اختلف فكري وطاحت عبرة ٍ هزّت كياني

والله انّا فاقدينه في صباح وفي عشيّـه
ليـت ربي قبل اعرف انّه توفـى قد خذاني

مؤمن بربي ولكن موقـف ٍ صعب ٍ عليّه
الحزن من مـر علقم قدّم الكأس وسقاني

مآورثـت الا مواجع باقيات ٍ ليٍ نديّه
اااه من هـم ٍ نعيشه احتويتـه واحتواني

الليالي في عيوني من فراقه سرمديّه
والله ان الوقت بالميسم على صدري كواني

مات مار افعول ابو فالح مع العربان حيّه
تشهد ازحول الرجال بفعل طيبه من زماني

راح راع الجود كله.. شيخ ماشفنا حليّه
لاهرج بين العرب في مجلس ٍ طلق اللساني

المكـارم من خصالـه.. فيـه مدّه حاتميّه
حـَب طبعه كل واحد من هله قاصي وداني

المحاسن لو نعـدّدها مثـل رش ابرديّه
مزنة ٍ هلت بردها.. سيّلت كل المكاني

الله انّه يرحم اللي ماعطـى درب الرديّه
حافظ ٍ عرضه و دينـه قلتها علم ٍ بياني

يالله انّك تغفر اذنوبه وزلات وخطيّه
وتِسكنه في عالي الفردوس في روض الجناني
محمد مرزوق السميري