ياللي تقول النصيحه وينها وينك
لاتبتعد واستمع دره ورى دره
اهمها يافتى حافظ على دينك
لاتتبع جاهلٍ زيف الهوا غره
وخل الكرم فى الحياه ابرز عناوينك
ترى الكرم لانقص مالٍ ولاضره
واحذر ثم احذر تبين للعرب شينك
الشين ماينمحي وسمه من الغره
واللي يحاول يقصّر من جناحينك
لاتلتفت له ولو نادى مية مره
وناسب حرارٍ كرامٍ دينهم دينك
ترى الحرار النوادر بنتهم حره
بكره ولدها يشد العضد ويعينك
والا بناخى الربادي يقطع الجره
واختر صديقٍ مضامينه مضامينك
من صاحب القلباني ماسلم شره
روز الخوي لين تثبت لك براهينك
الناس فيهم صحاح عقول ومدره
بعض العرب كبر ضلع طويق في عينك
واليا تكلم يصير اصغر من الذره
وبعض العرب ماتعده في موازينك
وان حدك الوقت يمه ناضرك سره
شعر/ ضاوي العصيمي