ياطير شفني ذا مكاني مْن عْصير
ايلين تطلع نجمة الصبح مانمت

فـ المزرعه والفكر ياخذ مشاوير
فيني.وانا في جلستي ماتكلمت

في بيتنا والحمد لله وبْخير
لاشك طالت مدة الحجر وحْلمت

اني بنجد وبين الاحباب ياطير
واسترسل الحلم وفرحت وتعشمت

فـ الحلم لين ايقنتها اضغاث لاغير
فرحَةْ لقاا لكن صحيت وتحطمت

ياواهنيك تصفق الريش وتطير
وتْشوقني فوق الحديقه الى حمت

هيضتني والشوق واهج وتفكير
مجتاحني لو فـ المشاعر تحكمت

واليوم لو تسمح بطلبه وتقدير
دام الحجر مرفوع عنّك ومادمت

ناوي على نجد العذيه مسافير
وناوي تحلق في سماهم وعزمت

بلغ تحياتي وعذب التعابير
لناسي,وسلم لي على الكل وسْلمت