صحيتني فالثلث الآخر من الليل
أحرمتني نومي وانا كنت نايم
شاركتني في وزنة المد والكيل
وتقول عني فيك مانيب هايم
ولازمتني حتى بـادق التفاصيل
وش عاد اسوي واكسب رضاك دايم
لابارك الله في هل القال والقيل
المارجين مروجين النمايم
الحاسدين الحاقدين المغاليل
أجسام بنيادم عقول البهايم
عانيت . لاوالله توذيت بالحيل
ماهيب هي يالابسين العمايم
لكن ياحلمي هلابك هلا هيل
عداد ماهبت علينا النسايم
قلبي غدى لك طاب فالك مداهيل
بالقيظ والا مع دخول النعايم
أشعل لجياتك شموع وقناديل
وافراح ودلالٍ تصب وولايم
صادق قسم بالله ماهوب تمثيل
والا على مايخلف السلم قايم
ولاهوب كذبة شهر نيسان وابريل
اللي يبررها ردي العزايم
أميل معك وعن هوى غيرك أميل
عن حب هذيّه وهذيك صايم
غنيت لعيونك طروق ومواويل
لعلها كانت لذوقك تلايم
اخترتها من منبعٍ كنه النيل
لولا ضلوعي تردعه جاك عايم
وصلت به صفوة عقول ورياجيل
غنيمتي يامدركين الغنايم
من حط بين عيونه الجدي وسهيل
مايلحقه لو ماوصل لوم لايم
والمعذره والعفو ماودي أطيل
والا سماي أصبح ملبد وغايم
فراج الكرشمي ..
وأدق التفاصيل ..
من منبع كنّه النيل ..
لا..لا
فالنيل لايملك إحساس فراج المرهف ..
ولا لغة فراج الحااالمه ..
فراج ستجدني هنا كثيراً ...
مع صدق الموده ..
أخوك/مستور الذويبي
|