ألا ياخويّـي خـلّ الأعمـال بالنـيـات
على منهج الخالق .. ومع سنة الهـادي
حقيقه ترى الحسنات تقضي على السيات
لكن الدروب ثنيـن : سيـده ومتحـادي
وأنا والله إنّي مدري اللـي تبـاه أيّـات
لاصار أنت في وادي وصاحبك في وادي
لكن اقرب اقرب دوك ياحامـي الهيـات
عشان انتفاهم بيننـا يابـن الأجـوادي
أبا أخبرك وجه لوجه .. من دون جاهيات
وأقول الحقيقـه دامهـا شربـي وزادي
مابيني وبيـن اللـي .. ينـم اتفاقيـات
لايقدر يصاحبنـي .. ولا يقـدر يْعـادي
ولا أفرّق الروحات عنده مـن الجيـات
هاذي شغلته ماغيـر سـرداد مـردادي
ماعمره مشا فاضي .. حموله خياليّـات
يشب الفتن .. ويشوفهـا كنـه حيـادي
ترى الفرق واضح بين الآحاد والميّـات
ولايشتبه فيهن سـوى التايـه الغـادي
لـو إن السوالـف ماتسبّـب حزازيـات
لقيت القبايل هاديه .. والوضـع هـادي
لكن ماش رجل ألاّ يجـي فيـه سلبيـات
حقيقه ماهيـب هـروج دلـه وبـرادي
سموم العقارب .. والثعابين .. والحيـات
ماتفرق عن هروج الخطا سم الأكبـادي
لاجاء حرف مخطي يعتبر عن عشر كيات
على الكفو .. والمبدول تصبح معه عادي
وأنا شرهتي يقصر مداها عـن العيـات
وتلحق رجال العـرف وقـروم الأولادي
وأقـدّم لهـم شكـراً وتقديـر وتْحيـات
وقاف القصيده .. ختمه المسك والكـادي
ابو عتيق
هذي تنسخ كلها
رائعه وصادقه من شاعر كبير
ورجل معرفه
والله اني افرح لاقريت لك قصيده جديده
لانها فعلاً تترك اثر ايجابي في النفوس
تقبل التقدير والاحترام
وصح لسانك
|