بهجـة الـروح، قلبـي لا تعذلينـه
باسباب حبك، و حبـك سـر حرمانـه
ترى جريـح الهـوى، كانِـك تعرفينـه
موتـه ليـا صـاروا العـذال خلانـه
و انتي جرحتيـه و اظهرتـي مكانينـه
و جيتي بصف العَذول مع اول اعوانـه
دامـك و سمتـي خفوقـي لا تزيدينـه
لا تنصحينـه نصايـح مـا لهـا خانـه
تِركِين وسْمك علـى الخافـق و تثنينـه
و بالثالثـه تدّعيـن الطـب... شفقانـه
وش لون أصدق.. تميتينـه.. و تحيينـه
و تضمّدين الجريـح... بباقـي اكفانـه
قلـب ٍ قتلتيـه، خلـي عنـك تابيـنـه
و دمع ٍ ذرفتيـه، ليـه يحـرق اجفانـه
يا شوك روضٍ حجب ورده و نسرينـه
حرّم شـذاه و منحنـي شـوك بستانـه
و تركني اعزف على طـاري رياحينـه
معزوفة من حروف الهجـر و الحانـه
لين أصبـح الشعـر تمنعنـي قوانينـه
و يمـوت معنـاه قبـل تشيـب قيفانـه
و صار الكلام يتحـادى عـن موازينـه
و حكي الوقاعة سلب من كفي ارسانـه
باسبـاب ترديـد حلـم ٍ بينـي و بينـه
خـطٍ ربـط مستحيـل الشـي بامكانـه
خـط ينـزّل رفيـع الـذات و يهيـنـه
لو يصبح الوصـل تبريـره و برهانـه
و انا مشيت الطريـق بزينـه و شينـه
و جربت قصة عذاب الحـب والوانـه
كله على شان مَن عين الوحـش عينـه
عين أشقر ٍ هز فـوق الوكـر جنحانـه
حـظٍ لراعيـه، منـوة كـل داعيـنـه
يزود من يوم جوا بـه فـرخ شيهانـه
و العنق عنق المها اللـي يـوم رامينـه
اخطوه...فز و جفا المرعى و ريضانـه
و الخد برقٍ سـرا... يسـراه و يمينـه
مـزن تدلـت علـى الاوطـان ربانـه
و النطق ذوب العسل باوقـاب جانينـه
في منحـل ٍ يبحـل المسكيـن باثمانـه
عذب النبا اللي يضيع الزين مـع زينـه
غـروٍ سبانـي، و عنّانـي، بهجرانـه
و ان قلت يـا بنـت قلبـي لا تلومينـه
تجملـي فـي حزيـنٍ طالـت أحزانـه
ومن يوم قالت: مرضك اشرح لنا و ينه
ما فيك شي.... احمد الله... قلت سبحانه
يشـوف شـيٍ بروحـي مـا تشوفينـه
ميـر اتركـي سكـة العـذال يافلانـه
خلـي كـلام الـعـواذل لا تعيديـنـه
يا مبتغى القلب.. داه.. دواه.. يااشجانـه
الله الله ياسلام
موهبة أصيلة
شكراً للشاعر القدير بدر بن ثعلي على هذه القصيدة المتميزة بالإبداع قصيدة جزلة من شاعر جزل وفي غنى عن التعريف
تقبل تحياتي وتقدير
اخوك حسين الدوسري
|