[align=right]السلام عليكم

حياكم الله، و يسعدني العودة لكم بهذه الجديدة آملا أن ترقى لسامي ذوقكم الكريم،،،

أخوكم
بدر بن ثعلي[/align]


[frame="10 50"][poem=font="Arabic Transparent,5,white,normal,normal" bkcolor="transparent" bkimage="backgrounds/26.gif" border="solid,2,red" type=1 line=0 align=center use=ex num="0,black"]

يا بهجة الروح، قلبي لا تعذلينه= باسباب حبك، و حبك سر حرمانه
ترى جريح الهوى، كانِك تعرفينه= موته ليا صاروا العذال خلانه
و انتي جرحتيه و اظهرتي مكانينه= و جيتي بصف العَذول مع اول اعوانه
دامك و سمتي خفوقي لا تزيدينه= لا تنصحينه نصايح ما لها خانه
تِركِين وسْمك على الخافق و تثنينه= و بالثالثه تدّعين الطب... شفقانه
وش لون أصدق.. تميتينه.. و تحيينه= و تضمّدين الجريح... بباقي اكفانه
قلب ٍ قتلتيه، خلي عنك تابينه= و دمع ٍ ذرفتيه، ليه يحرق اجفانه
يا شوك روضٍ حجب ورده و نسرينه= حرّم شذاه و منحني شوك بستانه
و تركني اعزف على طاري رياحينه= معزوفة من حروف الهجر و الحانه
لين أصبح الشعر تمنعني قوانينه= و يموت معناه قبل تشيب قيفانه
و صار الكلام يتحادى عن موازينه= و حكي الوقاعة سلب من كفي ارسانه
باسباب ترديد حلم ٍ بيني و بينه = خطٍ ربط مستحيل الشي بامكانه
خط ينزّل رفيع الذات و يهينه= لو يصبح الوصل تبريره و برهانه
و انا مشيت الطريق بزينه و شينه= و جربت قصة عذاب الحب والوانه
كله على شان مَن عين الوحش عينه= عين أشقر ٍ هز فوق الوكر جنحانه
حظٍ لراعيه، منوة كل داعينه = يزود من يوم جوا به فرخ شيهانه
و العنق عنق المها اللي يوم رامينه= اخطوه...فز و جفا المرعى و ريضانه
و الخد برقٍ سرا... يسراه و يمينه= مزن تدلت على الاوطان ربانه
و النطق ذوب العسل باوقاب جانينه= في منحل ٍ يبحل المسكين باثمانه
عذب النبا اللي يضيع الزين مع زينه= غروٍ سباني، و عنّاني، بهجرانه
و ان قلت يا بنت قلبي لا تلومينه= تجملي في حزينٍ طالت أحزانه
ومن يوم قالت: مرضك اشرح لنا و ينه= ما فيك شي.... احمد الله... قلت سبحانه
يشوف شيٍ بروحي ما تشوفينه= مير اتركي سكة العذال يافلانه
خلي كلام العواذل لا تعيدينه=يا مبتغى القلب.. داه.. دواه.. يااشجانه[/poem] [/frame]