السلام عليكم


جديده ومتواضعه اتمنى ان تجد القبول لذائقتكم الكريمه :




[poem=font="Simplified Arabic,4,black,bold,normal" bkcolor="transparent" bkimage="" border="none,4,gray" type=1 line=0 align=center use=ex num="0,black"]
تعبت أجامل نفوسٍ مالها ملّه = وأساير عقول مخدوشه ومربوشه

عاقل ولا أواخذ الجاهل من الزلّه = ولومي على الليّ يطول الطيب وينوشه

ماني بساوي بمعتدله ومختلّه = أجازي الرجل في هدوه وفي هوشه

من طاب لي طبت له ممّا أملكه كلّه = ومن لا أعتبرني ؟ فلا أعتبره لوّ أقروشه !

تركبّه مرسيدس وتسكنّه فلّه = وامن الفسق لوحة الفنان في حوشه

مغنيني الله بعزّ .. وطبعيّ أجبلّه = الصيت طيّب وفرش الحظ مفروشه

الله يبارك بحذف معزّب الشلّه = حرّك رحاة القصيد وسارت أطروشه

ياقوّ دقّه ويامقواك ياجلّه = سيماه في وجنة الياقوت منقوشه

ماني بمن مرتبة شعّار حيّ الله = الليّ يصفّق لها وتضيع فالطوشه

أتعب على طبخة المضمون وأزلّه = في ملحمة بيت ما جدره بمخدوشه

ياحيّ ذكر المزل ّ! وطاري الدلّه ! = وفنجال يجلي عماس الراس والشوشه

ماهو بفنجان أبو حسّان عبدالله = الليّ ينكّس على الحجان طربوشه

يدوب أصارع جبل ماهو بيا قلّه = أوله ماينذكر وأخره مريوشه

كثر الطواري براسي جعلها العلّه = خلّة وسيع البطان يطقّ شاكوشه

الاّ أنت ياطاريٍ لامرّ ما أملّه = تفتح له أبواب صدري قبل ما أحوشه

تقبلّه أشواق قلبي قبل تقبلّه = نفحات ودٍ من الحرمان معروشه

لي عام وأنا وتفكيري على ملّه = والوجد صدّام .. والتنهيته أجيوشه

عليك يالليّ مصب القلب منهلّ له = ومراتعه فالضلوع الحدب مرشوشه

غلاه بلّ العروق وقلبيّ أحتلّه = ومحبتّه صافيّه ماهي بمغشوشه

أمدلعٍ شايخٍ في زمتّه دلّه = وامن الترف عيشته قطعة ( ماكنتوشه )

والله مايسفهل الصدر ويفلّه = الاّ لسلهم سحى .. وأنكفّت أرموشه

لوّ كان بار الزمان وبانت الخلّه = ولاحت بروق الفراق .. وخويّة أعروشه

ما أدله ولا أسجّ من طاريه وأملّه ! = الاّ إنيّ أسج من سلهامة أرموشه[/poem]

وسلامتكم