حياك ياللي تبـي تسمـع قديـم وجديـد
لعيونـك اثنـي قيـاد الشـرد وعقالهـا
اقلط وانا باتعـوذ مـن ابليـس المريـد
واصـب لـك دلتـي وتـذوق فنجالهـا
مابه ثمن للقصيد إلا انك تطلـب قصيـد
ولا لعـوص المهـار ايكـون خيالـهـا
ادحم بفضل الولي واثبـت بقلـب حديـد
عسى الله يخل عيـن الحسـد بخلالهـا
مااصدق من الصدق غير الله ويوم الوعيد
والرحمه اللـي تظـل النـاس بظلالهـا
رحمتك يامن خلق فينـا شقـي وسعيـد
دنيـا الغرابيـل فــال الله ولا فالـهـا
مااخبلك ياللي تقـول ان البعيـده بعيـد
ياهيـه دنيـاك ماتبقـي علـى حالـهـا
كم فرقت من جموع وجندلت مـن عقيـد
تلـف وتــدور والنكـبـات تبرالـهـا
شف اللي امس وهو يبطش وكفـه يبيـد
ماكنهـا الا لــه اولاكـنـه الا لـهـا
اليـوم بيديـه قيـد وبيـن رجليـه قيـد
اشتالتـه صفعـة الايــام واشتالـهـا
يالله دخيلك وفي وجهك عسـاي استفيـد
واخـذ مـن ام العبـر عبـره وموالهـا
يـارب عفـوك وثبتنـي بعقـل رشيـد
واعوذ بك من عجوز ابليـس وعيالهـا
مانيـب شمـات لا والله ولانـي بلـيـد
ولا بطمـاع فــي بقـعـا وتمثالـهـا
ياللي تقول ان فلان عبـد وفـلان سيـد
وتقيـم النـاس بصورهـا وباشكالـهـا
لو انك قيمت نفسـك قبـل زيـد وعبيـد
بتقـول لعبـاد ربـي مالـي ومالـهـا
ماكل مـن تستشيـره جـاب راي سديـد
برق وفـرق وشـف يمنـاك وشمالهـا
اكبر دليل ان مهي تاتي بسطـوة عنيـد
كـم واحـدٍ يطـرد اهدافـه ولا نالهـا
ان كان ما الله عطاك افعد ماكن لك ايـد
وان كان مالك يديـن شلـون تنتالهـا؟!
مواهب من وحيـد الملـك مالـه نديـد
لـو انهـا بالمحايـل كـلـن احتالـهـا
والرابح اللـي لـك الله يستفيـد ويفيـد
ماغرتـه مـن تخلخـل لـه بخلخالهـا
اللي عمل للممات وفـي حياتـه زهيـد
خـلا جمـال الضلالـه عنـد جمالهـا
يدري ولو طال عمـره ماخـذا مايريـد
ونهايـتـه حـفـرةٍ متهـايـل جالـهـا
والموت ماهوب يوم تـروح روح الفقيـد
لاقفت سنيـن الحيـاة وطويـت حبالهـا
المـوت والله بعـد المـوت علـمٍ اكيـد
عنـد الصناديـق يـوم اتفتـح اقفالـهـا
ولا الحياه ان تعيش العمر عمـرٍ مديـد
لابـد لـو طولـت ماتقصـر طوالهـا
لاوالله الا حيـاةٍ بعـد موتـك شهـيـد
او يغفـر الله لنفـس ويقبـل اعمالـهـا
دنيا البقا خير مـن دنيـا الفنـا والمزيـد
في علم مـن علـم الانسـان باهوالهـا
سبحانه المبدي الفـرد الصمـد والمعيـد
ماغير رحمـة ولـي العـرش نلجالهـا
نرجيه حسـن الختـام بساعـةٍ ماتزيـد
والمغفره يوم تجـزى النفـس باعمالهـا
يقول في محكم القول ان شكرتـم لازيـد
وان الامانه عجزهـا الطـود ماشالهـا
ويقول جل ان كفرتم فان عذابـي شديـد
اّمنـت باللـي امـر جبريـل بانزالهـا
يبقى الرجا باللي اقرب من حبال الوريـد
يابخت نفـسٍ رضـى المولـى تهيالهـا
ماكل عيدٍ على اهل الشرق للغرب عيـد
ياسـرع دور الليـال البيـض وهلالهـا
والشجره المثمره تثمـر وترجـم بحيـد
ويسبهـا اللـي بعيـدٍ عنـه ماطالـهـا
نركض ورى احلامنا ولكل ضـدٍ ضديـد
ويحلهـا ساعـة الضيـقـات حلالـهـا
ان جات ماردها منـك عضيـد ورصيـد
واصحاب الاموال ماتدفن مـع اموالهـا
وجيد الحكي واللسان الطلق ماهوب جيد
النـاس بافعالهـا ماهـيـب باقوالـهـا
تذوب بعض السوالف مثل ذوب الجليـد
اضرب مثـل والاوادم تضـرب امثالهـا
والنعم بابنا الحمايـل كـل حـرٍ يصيـد
قسمـه ليـا هـد دق الصيـد وجلالهـا
هذا بعض ماانتقـاه الفكـر غفـلٍ وغيـد
ياخـذ مـن جزالهـا ويجنـب هزالهـا
بيني وبين القصيد الجزل ساعـي بريـد
مثـل المخاييـل يـوم تهـل همالـهـا
اشطب 100 بيت لاجل اصوغ بيت فريد
للـي يميـز خفـاف الـوزن وثقالـهـا
يامن طلبت الجديد انا لـك ابـن امهيـد
تاتيـك بالضمـد ماتاتـيـك بلحالـهـا
هديتي لك قصيده مـن عيـون القصيـد
من سمعها قال صح لسـان مـن قالهـا
صح لساانك ياااعوووض مليوون ولاهنت
والف شكر على هكذا شعر لاعدمناك
احترامي وتقديري
اخوك
|