تواترت عنّك اخبار .. وعزمت القصيد
في حفل تأبين .. ابو تمـام والبحتـري
اسدلت عنك الستار .. المخملي من جديد
قدمتك بكلمتين .. وقلت وش تحتـري ؟
مايحتويك إنتظار .. ولايجاريـك عيـد
يانفحة الياسمين .. اشتاق لـك منبـري
واقبلت مثل النهار .. وجعل عمرك مديد
اهديتني نجمتين .. وكوكـب المشتـري
لولا هداياك صار .. الشعر طفل بليـد
يامختزل مبدعين .. الشعر في دفتـري
البارحه فوق نار .. الحزن ذاب الجليـد
لين انصهرتك حنين .. وراح لك اكثري
ماضمني لامدار .. ولا احتواني بريـد
جيتك وبي دمعتين .. ضاقت بمحجـري
الشوق ماله مسار .. وسكةٍ مـن حديـد
لامرني قلت وين .. اهيم ؟ قال اصبري
واستاقني في إطار .. الحب باسه شديد
ورجعت بالله يعين .. ولا اتهم الله بري
في كل يوم احتضار .. وكل ليله شهيـد
ياما حصدت الانين .. بحكمك العنصري
فترة غيابك حصار .. ايامها من وعيـد
ومشاهدك نخلتين .. طلعهـن سكـري
ياللي عيونك مزار .. ونظرتينك صعيد
محبتك فرض عين .. وشوفتك تنشـري
خلك معي يافنار .. الروح مسك الوريد
البعد جنبه متين .. وعظم صبري طري
نيّافه
وحضور يسعدنا وشعر يروي عطشنا للشعر الراقي
شاعرة تملك موهبة رائعة وتمكن مدهش واحساس مؤثر
نفخر كما يفخر الشعر بتواجد امثالك
تقبلي التقدير والاحترام
|