عسى ان ترتقي الى ذائقتكم


[poem=font="Simplified Arabic,4,black,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black"]
ياحيّ غيم الهجوس وحيّ ماطرها = لاحنّ رعادها .. في صدر واليها
امّا ذكرها من اولها ليا آخرها = والا نساها من اولها لـ تاليها
تعيش وتموت حيّه في مقابرها = افضل ..ولا تذبح الغربه معانيها
بعض القصايد تموّتها دفاترها = وبعض القصايد تموت بصوت راعيها
لاصار الاحساس كاذب عند شاعرها = عادي لو يجيبها ولاّ يوديها
الصدق بابور للنفس ومشاعرها = يرسي باحاسيسها على موانيها
وانا هجوسي ليا لاحت بشايرها = قابلتها بالشعور اللي يغذيها
امرها بالجوارح في منابرها= واهدّي اوضاعها على كراسيها
من فيض .. في وارد جروحي وصادرها = ومن غيض..في بايع الذمه وشاريها
والبارحه دمعتي طاحت بوادرها = على كفوفي من عيوني لـ غاليها
بلشت في الذاهبه و ابطيت ادورها = واستكثرت لاتعلمني باراضيها
اللي بعد كدّت الفرقا ظفايرها = ما عاد في البال طاري غير طاريها
يزورني طيفها و آخيل ناظرها = واسمع سواليفها فجأه.. واحاكيها
غابت ولا قصت الايام دابرها = كل الاماكن احس بروحها فيها
ياكثر ما كنت اداري ضيق خاطرها = حتى على حساب روحي كنت اداريها
كنت اتحاشى الكلام اللي يكدرها = وكانت على اي شي تزعل لاجل اراضيها
اقسم برب السما مانيب خابرها = الاّ انها ..في ذرى الروح ومحانيها
مكانها اللي تعرفه عند شاعرها = تجيه في ايات وقت الله يحييها[/poem]