الهواوي غصن اخضر والهواويه حمامه = والحمايم والغصون يشكلون اكبر قضيه
اجتماع اثنينهم يعني هناء الحب وسلامه = وافتراق اثنينهم يعني هنا الحب الضحيه
واقبلت فتنه فداها الروح والجسم وعظامه = كنها مزنة حيا سمت على الجرد الضميه
شرفت تشريفة الحاكم على عرش الزعامه = وامنت تأمينة الراعي على حال الرعيه
وامتطت صهوة خفوقي واجذبت يدها خطامه = واركضت به عن غرابيل الزمان الاوليه
حالمه ومسالمه وعلومها طيب وقرامه = واثقه وموافقه لأسلوب ليلى العامريه
كيّفه ورويّفه وخفيفة ظل وهمامه = طيبه وحبيبه ودروبها خضر ونديه
ناعمه ومناغمه للقلب وتحالي نظامه = هاديه ومعاديه لهروج حمّال الاسيه
والقمر فرقه عن اللي تشبهه ليلة تمامه = انها دايم تشع النور ولها جاذبيه
والصبايا سيدات الحسن ربات الوسامه = مالهن عقب اخر العنقود عندي قابليه
كل مكنوز الجمال اللي خذنه راح شامه = فوق خد الناهيه فالحسن والذمه بريه
واهمست لي قالت انت الشعر قلت:الشعر هامه = وانتي التاج المرصع فوقها"جعلك قويه"
مايجاري وصفك الاّ من يبي يعلن فطامه = غير شاعرك الحميم (مع احترامي للبقيه)
ياقصيدي لاعدمتك فتنة القلب وهيامه = اخت روحي وام بوحي لاتروح الاّ رضيه
انتبه منها تضيق ان ضاقت تقوم القيامه = وسط جوفي كان ماودعت قبل اقول شيه
فلّها عشق وغرام وقل لها حب وكرامه = وارحم اعصابي علشاني ترى ماعاد فيه
كل مافرّع هوى عن وجنته وارخى لثامه = دون سابق علم بيّن مات "مجهول الهويه"
غن واطمع من ثغرها بالرضا والابتسامه = ليت تاتيك ابتسامه...وابتسامتها شويه!!
غن لين الليل الاول يسرق الثاني ظلامه = ثم روح في سبيلك ... واترك الباقي عليه
الله الله الله الله الله الله
الله الله الله الله الله الله
استاذي القدير الشاعر\\\\\ كلاش
والله مادري كيف ارد على هذه الباسقه ولكن انت مقامات الشعر الاصيل
صح لسانك
وتقبل صريح الاعجاب وصادق الموده
اخوك\\\\ سعود غنام
|