بسم الله الرحمن الرحيم

السلام عليكم اخوتي الكرام ورحمة الله وبركاته ..

وبعد ’’’’’’’’’’
فهذه محاورة المرقاب المباشره ، والتي جرت بين الشاعرين :

حمدان العصيمي و سعيد الفهري

ليلة السبت بتاريخ السادس من صفر لعام ثمانية وعشرين وأربعمائة وألف للهجره النبويه
على صاحبها أفضل الصلاه والسلام .

حيث بدأ العصيمي قائلاً :-

حمدان
هلا مرحبا في منتدى الشعر والابداع= يديره عقولٍ تدرك الشعر وبحوره
والاياسعيـد السر يحفـظ ولاينـذاع= وابوزيد في موج البحر دف بابوره


سعيد
يدوم البقا والسوق للشاري البياع =لو ان اكثر الاسواق بالخير معموره
ابو زيد بابوره يدفه بـدون شراع =على غبّة(ن) في دبـرة الله ماموره


حمدان
الايام يظهر غيبها والدروب وساع= ولاقدمـك الاّ رايـة العز منشوره
ليا كبرت الهوشه ولاجالها فراع= تبي تعكس الواقع من الصوت والصوره


سعيد
الايام ما أكثر شرّها والزمـن خدّاع =ياكم راية (ن) في عجّة الخيل مكسوره
ياحمدان هوش قرود ماهو بهوش سباع =على شان كيلو موز واثنين بندوره


حمدان
نعرفك طويل ذراع ماانته قصير ذراع=لكن الزمان أتعبك واشبعك من جوره
ليا ماحسمنا المشكله خربت الاوضاع= ومات اليتيـم ولقمته وسط حنجوره


سعيد
عسى الله يخفف لوعة الفاقد الملتاع =فقد له فقيـد خرّجه حتـى عن طوره
ترانا حسمنا المشكله والحياه صراع =صراع المريض اللي عرف قدر دكتوره


حمدان
ترى من يطيح من الجبل ماله الاّ القاع=ومن لا يشير الناس ماينقبل شوره
يادكتور حاول تقلع الضرس بالمقلاع=وبـاقي الدعاوي خلها عنك مقدوره


سعيد
ليا شفت عسّاس الحيا ضيّع المرباع = فعلّمه عن قاع من الوسم ممطوره
اخاف اقلعه وتجيه سكته ورى الاضلاع =وافوّت عليك انتاج عقله ومذخوره


حمدان
سريتوا على نور القمر والدليله ضاع= وراحت مكاسبكم على الدرب منثوره
ليا اشتدت الكنه وسمن الشواوي ماع= تجيك العلوم اللي لها أيام مستوره


سعيد
سرينا بعد طاحت رقاب خضر وقلاع =واثاري بعدنا نكّسوا بيرق الثوره
انا منتصر بالله وبالحق والاجماع=ولا ينتصر من حط الاهواء دستوره


حمدان
يابين الخوى في روسكم والبطون جياع= ثمانين رجل وزادكم كيس شابوره
اخذ ياسعيد التجربه والرجال أنواع= مضى عصر قيصر وانتهى الظلم في دوره


سعيد
ياكثر الوصخ في ثوب يجمع ثمان رقاع=بي تلبسه عوره تبي تتركه عوره
اعرف البنادم ياعصيمي خلق طمّاع =لو اعطيه سيّاره وسلطه ومقصوره


..

ودمتم بخير ,,,,


*حقوق الطبع محفوظه لشبكة ومنتديات المرقاب الأدبيه .

سنين العمر مقفيةٍ مطاياها
بعضها راح في عقل وبعضها غي!

ماغير ابحث عن الحكمة ولا القاها
والاول ماترك للي خلافه شيء✋
.....

....

...

..

.