سقى الله ياعطا قمح السنابل فالبـراح البـور
بعد يبست معاليـق المحبـة فاقـرب احبابـي
تعبت استنزف امطار السحابة واكشف المستور
على صفحة تعابيـر إختناقـي فـاوّل كتابـي
وانا مابين طعنات الظلام وبين جـرح النـور
أدوّر في مفاتيـح الحيـاه اللـي قفـل بابـي
ثلاث شهور! لا والخالق اكثر من ثلاث شهور
وعيني ما وصلها شـي مـن حنّيـة أهدابـي
تمادت وانكسر غصن الغرام وهاجر العصفـور
وضاقت به سماه وضقت منه وضاقت ثيابـي
دخيل الله ياشوق المدايـن والقـرى والـدور
ماعاد اقدر على خنجر خطاك وزفـرة عتابـي
تعال وشوف وش سوى لهيب النـار فالتنّـور
بعد ما حطّم امال القناديـل احـرق اعصابـي
اجامل واتجاهل واتحرّى الشـوق يلعـب دور
وانا ماغير انتّف ريـش جنحانـي بمخلابـي
ولا ياليت لاصحاب القلـوب الطيّبـه دكتـور
ما كان اشعبت لأسماع الخلايق ضيقة ركابـي
بامانه يا شبيه الـورد والريحـان والكافـور
وش اللي في غيابك صبّرك غايب عن غيابـي
وانا لامن ذكرتك كـنّ خفاقـي علـى دافـور
واذا شمّيـت ريحـة ذكرياتـك سيّـل لعابـي
اثر بعض القلوب تموت حيّه لو تعيش دهـور
واثر بعض الغلا مثل الحياه بعيـن الأعرابـي
تراك اذنبت في حق المشاعر وانت دون شعور
ولا يمكن تحس بثورتـي فـي راس مرقابـي
تبا تعرف وش احساس القهر فالعاشق المقهور
تخيّل لك رهينة واقعـه فـي قبضـة ارهابـي
بصراحه اختيار بيت اوبيتين مثل اخذ خرزه من المسباح
منظومه متكامله محمله بالابداع الحقيقي
|