الشاعر الكبير : مفرح الضمني
مقتطفات من قصائده رحمه الله
ياموتري شد عزمك دق الساعه ** خلي كذب بالوعد والزام قافيني
عزي لمن صاحبه عقب الغلا باعه ** زاد الجفا واشترى ناس جديدني
الله يلوم الغضي وش غير اطباعه ** وانا احسبنه على الدنيا يصافيني
فيما مضالي يقول السمع والطاعه ** واليوم صد وتكبر مايحاكيني
يارجل منتي ورى المقفين تباعه ** عيب عللى اللي تبع ناس مقفيني
من لاعرف وين مدخاله ومطلاعه ** يصبر على ماجرى بالعسر والليني
وله ايضا:
بس لاتعاتبني ترى البال مشغول ** ماحمل عتابك والليالي طويله
حل الهوى بيننا حل معقول ** اما تشيل الحمل والا نشيله
هذا نصيبي عندكم ويش اباقول ** ماعاد عندي ياريش العين حيله
هنيت قلب ماتولع بمحمول ** ماولعنه ناقضات الجديله
لاسايل عنهن ولا هو بمسوؤل ** مايعرف الا مصحفه وتهليله
وانا ذبحني ناعس الطرف مكحول ** سنه صغير والوصايف جميله
يلوعني لوع الوحش لابرق الجول ** بكر هداده والمراعي مسيله
ويفرني فر اللواعيب للقول ** خلا قليبي كورة له عميله
وله ايضا :
يوم جيت البيت ماشفت رواد يروده ** مالقيت الا العصافير واشجار النباتي
قلت ياجيران هالبيت من ذير عنوده ** علموني بالخبر والجواري جارياتي
قالوا الجيران سافر ولانعرف وجوده ** هقوة انه يطلب العلم بين الجامعاتي
قلت وين القاه قالوا ورى الغربي حدوده ** في ديار ماتعرف البراقع والعباتي
اتصل بانكلترا والمطار اسال جنوده ** ياعسى تلقى الخبر مع مدير الطايراتي
قلت يرجع بالسلامه ويوفي لي وعوده ** واتمنى له يجيب الشهايد عالياتي
وهذه القصيده يتوجد فيها الشاعر مفرح بقوله :
انا هواي جويدل دلها زين ** تلعب وتضحك والمبيسم ذبوحي
حبيتها حب الشرف للشريفين ** قلبي عليها مثل ورع شفوحي
ورع يذاود عبرته والدهر شين ** البيت خالي والرعايا سروحي
وجدي عليها وجد من حده الدين ** قليل مال ولا المدين سموحي
او وجد من جاروا عليه السلاطين ** بالسجن مضيوم قليل الشبوحي
او وجد عود واصل عمر تسعين ** ماتوا عياله والقريب شحوحي
او وجد عذرى زوجوها مسيكين ** تبغى الفراق وكل يومن طموحي
بليت بعفش مايعرف القوانين ** وجهه كريه وبالعطايا شحوحي
ياليت عمري ياعرب وقم عشرين ** والحق هوى بالي واداوي جروحي
فيما مضى نمشي بروض وبساتين ** يرقص لنا غصن الهوى بالمزوحي
واليوم في بيتي كسير الجناحين ** عاجز وشيبي في الصوابر يلوحي
امسي بهم ويصبح الهم همين ** هم يراودني وهم يروحي
يالله ياغافر ذنوب المصلين ** ياواحدن تدري بحالي وتوحي
تغفر ذنوبي يوم عرض الموازين ** وانت اللذي لذنوب عبدك دموحي
يقول الظمني :
يالمعلم دخت من كثر الكتابه ** حضرتي للدرس من كبر المصايب
دفتر التعليم قلبي ماشقابه ** شقوتي في صاحبي ضافي الذوايب
يالمعلم لاتطالبني طلابه ** شل قراطيسك وجوز من الطلايب
لاتلوم اللي تعذب في شبابه ** عذبه طفل مع البدوان غايب
صاحبي يم النفود اقفت ركابه ** حالف لانصاه لو دونه نشايب
لو تشوفه يالمعلم في ثيابه ** كان تصبح من جميع الدرس تايب
يقول الظمني في النصيحه :
تعالوا ياهل الشيمات ياللي تفهموني ** توحوا للجواب اللي يناسبكم صوابه
انا قبل احسب ان المرجله طرق اللحوني ** سوات اللي جمع له مال ماحسب حسابه
لقيت المرجله تمشي على تسعة ركوني ** تنادي من يحب الخير في منزل كتابه
الاوله بذلة المعروف باللي يبذلوني ** ترى من يبذل المعروف بالطيب لقابه
واقول الثانيه من ضاع دينه طاح دوني ** ومات بملة الكفار والله مادرابه
واقول الثالثه والدك والدم الحنوني ** توقع لاتقاصيهم وتجعلهم ذيابه
واقول الرابعه عن ضيفكم لاتبخلوني ** اليا جاء في محل الجود قولوا مرحبابه
لان الضيف ضيف الله وقدره مايهوني ** وبيت العز يالاجواد ماينصك بابه
واقول الخامسه للجار حذرا تغلطوني ** ويلزمك احتمال الجار مع كثر الحبابه
واقول السادسه درب النمايم لاتجوني ** ترى راعي النمايم مايحوش الا الخيابه
واقول السابعه باللي ومن بك لاتخوني ** اليا خنت الامين يحطك الله في عذابه
واقول الثامنه عن كل خايب تبعدوني ** ردي المعرفه وسع جنابك عن جنابه
واقول التاسعه لطمة عدوك بالعيوني ** اليا منه زما العايل ترى الذله عيابه
نصيحه قلتها من قلب للي يسمعوني ** على تسعة ركون وكل ركن قلت مابه
|