منتديات المرقاب الأدبية - عرض مشاركة واحدة

08-07-2007, 02:30 PM

اخبارنا حق اليووم

حلوه وخفيفه ومعها لكزس <- بالله لا يكثر :d

أولا نبدا من الأسير نواف بن فيصل بن فهد يقولك انه وصل لجاكرتا أمس واستقبله السفير وووو الخ ما حناب في اخبار الساعه 9 ونص يوم نجيب خرابيط استقبل وودع المهم يا طويلين العمر ان اسير الشوق وصل لجاكرتا وقال له السفير مشينا طال عمرك اوديك لشقتك قال ما والله اطبّها لين اشقـّر وأمر على العيال في الملعب اشوف جديدهم واشوف وش عندهم من علوم وأخبار المهم انه استاجر له كورولا من المطار وسيده على الملعب وقابل اللاعبين وقال لهم ترى خادم الحرمين الشرفن صاحب السمو الملكي الملك عبدالله بن عبدالعزيز آل سعود ابو متعب حفظه الله ابقاه ورعاه يسلم عليكم ( من ان الي اذكره ان ابو متعب مسافر ؟؟ ) وان صاحب السمو الملكي الأمير سلطانبن عبدالعزيز ال سعود ولي العهد ورئيس الدفاع والطيران والمفتش العام يسلم عليكم بعد ( المهم انه ما امداه يخلص اسماء الملك وولي العهد الا نص االلاعبين قد نامو من طول الاسماء لا اله الا الله وقالهم تراكم تمثلون المملكه كلهم بما فيهم فيصل بن دويحان وانكم لازم تقدمون مستوى مشرف واننا ما قعدنا نكرف ونسوي خطط علميه مدروسه الا عشان تشرفوننا وإن ما شرفتونا والله يا نصكم ليرجع من السعوديه لنيجيريا والنص الثاني بيرجع لليمن والسودان عشان تعرفون ان الدوله ما قصرت معكم .. وقعد يتمشى طال عمره فالملعب بالكووريلا وقابل سعد الحارثي وياسر القحطاني وسولف معهم شوي ثم قابلوه الصحافيين قالو هاه يا طويل العمر بيرجع أحد مع المنتخب قال هالحين وش لقفكم ووش دخلني انا كل الشغل بيد المدرب حنا سلمانه المنتخب وبنستلمه منه على المفتاح ويوم قالو انه استبعد المنتشري قعد طال عمره يصرف لهم من ذا الديباجات الين عضو الأرض ثم راح طال عمره يرتاح في شقته .

....................................

عمان فرّطت في فوز تاريخي على الورل الاسترالي .. عمان الي ضغطت الشوطين الأول والثاني وكان دفاعها مرتاح لان فيدوكا ماكان يمهم سرى ليله يرفع في سرواله ويشده من كثر ما زلق مع الرطوبه .. وتقدمت عمان مع نهاية الشوط الأول ( طبعا قبل لا يخلص الشوط لاحد يجي يقول بين الشوطين ) تقدمو عن طريق بدر الميمنى الي سوّى هو وربعه حركه يفيد مراسلنا من تايلند ( عمر المنطعج ) ان نص جمهور استراليا اسلم وهو وذمته عاد مالنا فيه شغل المهم ان عمان ضيعت الشوط الثاني ثلاث فرص أكيده لتعزيز تقدمها عن طريق الحوسني وبشير وكانو مير كلها صدها الحارس الاسترالي الصتيمه شواريزر لين قبل المباراه وعلى نظام (....في آخر ركعه ) حاقوها عمان وسجل تيم كاهل هدف التعادل للاستراليين الي طلعو من الملعب وقلبوها سامري استرالي في شوارع تايلند

ومن ناحيه ثانيه تلزخو الأمارات ابطال كاس الخليج ( وجه كاتم الضحكه ) من فيتنام الفريق المغمور بس انه صاحب الأرض والجمهور الغفير 2/0 سجلوها في الشوط الثاني عن طريق هيونه ثانه ولي كونغ فينه (والله من زين الاسامي اول مره اشوف فعل مضارع اسم آدمي ) الإمارات خنبقو في ذا المباراه لين قالو آمين والشي هذا ما يلغي افضلية المنتخب الفيتنامي الي اعتمد على سرعة هالاقزام الي عنده وسجّل هدفين متكتكه ولا أحلى دق فيها أول مسمار في نعش المنتخب الابيض الي وصل لكاس اسيا ومعه هاله اعلاميه ( ما تقرب لهاله صدقي ) لو يسوون هالهاله للنصر جاب بطولات الدوري كلها مير ميتسو مدرب الامارات يقول في المؤتمر الصحفي لا تقول بر لين توكي عليه واصبرو فيتنام عطيناهم وجه مير نوريكم في اليابان وقطر ان ما خسرنا منهم باقل من اثنين مانيب ميتسو

......................

هالحين عاد نديور للمحليات

اليوم الرئيس الوسيم والجميل والرشيق منصور البلوي الساعه سبع ونص متواعد هو وجماهير النادي بيطلعون سوا ويتواجهون عشان يعلمهم من الي معه في ادارته ومن الي مهوب معه عشان ما يكثر الحتسي والبربره خصوصا من الحمادي وربعه الي يقولون انهم شابين على البلوي هالفتره عشان صفقة الطريدي وعشان كم شغله قاعد يسويها ماهيب جايزتن لهم فقررو يشبون عليه وينشرون شائعات .

عموما أمس انطلقت تدريبات النمور وغاب عنها ابو نور ( هنا تتجلى موهبة الشعر في السجع ) وغاب اسامه المولّد يا هملالي على اليوم الثاني للتوالي ( قايل لكم موهبه ) ويقولك ان ادارة الاتحاد راحت لخميس العويران وطارق المولد وقالو لهم اطلبو لالله ماعاد نبيكم وفينا وفيكم شوفة الله ان لقيتو نادي الخير واهله وان ما لقيتو ما حناب مسؤولين عنكم توكلو على الله وفي نفس السايق تاخر المحترف الكيني كيتا عن الحضور لان حجوزات الطيران تأخرت الظاهر انهم لازم يحللونه زين ويتاكدون انه ادمي عشان ما ينشال مع العفش بالغلط.

............

خلّصنا من الإتي نمر على الهلال الي رجع يفاوض الطريدي اعاره لمدة سنه بمبلـغ ثلاثه مليون وإعارة ثلاثه لاعبين من نوع (110) للقادسيه لكن الطريدي قال يا رجال الدوادي هذي مهيب علي الي يبيني يخطبني من عند مدير اعمالي أحمد القرون والاحتراف قسمه ونصيب

...................

نمر على الأهلي يقولك ان بوكير بينتف 9 لاعبين من اللاعبين الي يتدربون معه الحين وبيكتفي بـ 28 لاعب يغادرون لتونس للاستعداد والمشاركه في دورة art وبرضو الأهلي رجعو فهد عداوي ظهير نادي الحزم الي خلص عقده مع الحزم ورجع لفريقه الاصلي الاهلي كلاعب هاوي

.............................

عاد نجي للعالمي الي امس طب معهم الظهير الجديد لاعب الفيصل عبده برناوي ويقولون ان ريان بلال بيلحقه خلال اليومين الجايه على حسب كلام وتأكيدات الدغيثر الي اشك انه مروج مخدرات نعنبو بليسه ما ينام ذا الادمي يستقبل لاعب الساعه 4 الفجر ويسوي الغدا الظهر ويحضر التدريبات من العصر للساعه 10 نعنبو بليسه ما أقواها والله . ويقولك بعد محمد شريفي سوّى حفله صغيره عشان جاله بنت ولا حدد التقرير من لي جاب البنت هو والا زوجته الزبده انه بينكتب بالاسم الي في كرت العايله

...................

ما ننسى نمر على الشباب الي امس انتظم في تدريباته اللاعب الاتحاد الظهير حمد العيسى لمدة موسم واحد اعاره والعقد بيوقعه اليوم بالرغم من ان فريقه ينتظر مدربه الارجنتيني انزور الي يقولون انه بيجي اليوم والعلم عند الله

.................................

مقال الأخبار

زاويه يوميه أطل بها عليكم تحت عنوان

>> off side>>

• كثر الكلام حول مستقبل المنتخب السعودي في كاس اسيا وان الأخضر مهوب مسوي شي
• وان المباريات الوديه فضحت المدرب انجوس وتكتيكاته وانا اقول لا تقول بر يا الجمهور الحبيب لين توكي عليه
• في تصفيات كاس العالم 2006 حضرت مباراه وديه للمنتخب السعودي ضد المنتخب المصري إمتلى الملعب بالجمهور سواء السعودي أو المصري وخسر الأخضر بهدف تحت قيادة كالديرون
• في المباراه الي كانت بعدها بأربع ايام حضرت مباراه ثانيه للمنتخب السعودي امام المنتخب الفنلندي الي يومها ما كان بكامل نجومه ولزّخو صقورنا بأربع اهداف مقابل هدف بالراحه منها هدف من نص الملعب أدى لابعاد الحارس النصراوي محمد شريفي من المنتخب ومنحه من ذيك الايام تذكرة ذهاب بدون عوده
• بعدها بـ أقل من أسبوع حضرت على مضض ومكرها مباراة الاخضر أمام كوريا الجنوبيه في أول مبارياته وأجبرت اني احضر في الملعب قبل المباراه بساعتين توقعنا الملعب مليان ولكن حضرنا وقعدنا نهش ذبّان لحالنا وكل واحد من الرابطه يغنّي لحاله تقول قاعدين على كورنيش بالمقابل الجمهورالكوري الجنوبي على يسار المنصّه يعكس واجهة التشجيع الحديث وبأسلوب راقي وبدون ملل وكلل وطفش وتعب
• بدأت المباراه شاهدت لون أخضر في المباراه الرسميه ما شاهدته أبدا في المباريتين الوديه الي قبلها وأصدقكم القول ان كنت حاضرالمباراه وأنا أقول ان خسرنا بإثنين قدام كوريا فترانا أطلدز ناس
• انتهت المباراه نتيجه ومستوى بهدفي كريري وياسر القحطاني وتوحّدت صفوف الرابطه بقدوم المتألق صالح القرني من جدّه ومعه فوج من جمهور جده الي تبرع لهم منصور البلوي بطائرتين في ذيك المباراه وفعلا دخلت الملعب يائس وخرجت منه وأنا أحضر أمتع مباراه حضرتها في حياتي بعد مباراة النصر والهلال 4\4
• صحيح ان آنجوس يتخبط في التشكيله ويتخبط في الإستبعاد وإن الاتحاد السعودي ما يناقشه في شي ممكن يكون عدم مناقشتهم للمدرب ظاهره صحيه ولكن الكارثه ان ناصر الجوهر مساعد المدرب يقول ما بيدي شي وكل شي بيد المدرب أجل وش فايدة الجوهر وخبرته في المنتخب هل وضع مساعد مدرّب والا قهوجي وسواق لآنجوس
• بإختصار اتمنى ما نقسو على المنتخب السعودي لين نشـوف آخرتها وشهي ووش بنطلع به من كأس اسيا كفوائد وأضرار وبعدها لكـل حادث حديث
.................

ومضه

هلا رأيت الخيل يا ابنة فرغلي ... تاطا صعانين الحصى ما تشوفه

( منيب عاقل ظلال احمد الشمراني ) :D

كاركتير العدد

:D

مراسلكم من الدوام

فيصل بن دويحان

نقلا عن موضوع نزلته في حارة المساطيل