[align=center]السلام عليكم ورحمة الله وبركاته[/align]




[poem=font="Simplified Arabic,5,black,normal,normal" bkcolor="transparent" bkimage="" border="none,4,gray" type=1 line=1 align=center use=ex num="0,black"]
كم لي وانا اطرد هاجس الشعر وانهاه=و اشحّ بانفاس العمر عن مساريه
أشوم عنه الين قفت مطاياه=ماعاد له فيني ولا عاد لي فيه
وانا ادري ان القلب لا جاه ماجاه=غصبٍ عليه يجر قافٍ يسلّيه
كم لي عنه يا صاح واليوم طرّاه=وجدٍ عظيمٍ هيّظه بعد غاليه
ياقرة الخافق و نوره وسلواه=يا اغلى من انفاسه وما تملك يديه
يا اصدق حقوقٍ يروى القلب من ماه=واطهر جبينٍ قبّله بين عينيه
قلبٍ بقربك عاش عمرٍ تهنّاه=ربيعٍ ايامه و عيدٍ لياليه
قلبٍ حشا ماقط شيٍ تمناه= ألاّ و جودك دون منّة يلبّيه
قلبٍ ليا من تاهت و حارت خطاه=هداية الله منك رايٍ يقدّيه
قلبٍ كنينه كنّك تويق باقصاه=يبوح لك باللي عن النفس يخفيه
وان ضيّقت دنياه وحشة خطاياه=تحت قدمك يكفّر الله معاصيه
هناك راحة وانشراحة حناياه=نعيم جنة عدن هذي مباديه
فضلك علي من خلقتي كيف ابجزاه=القلب من بين المعاليق دوكيه
ندهت لك من لوعة البعد : "يا ياه"= و لدّ النديم وقال : ناديت ؟ قلت : ايه
ناديت حيٍ ياعسى الرب ياقاه=من كل مكروهٍ عسى الله يعافيه
البعد يا مشكاي ماوالله اباه=أحّيه ! ماتبرد لظى جاشي أحّيه
مير القدر مكتوب والحمد لله=يالنفس اذا ماطاعك الوقت طيعيه
هذا قدر ربٍ حكيمٍ و حيّاه=عساه يكتب عودٍ أحمد بتاليه
قافٍ لاجل عين الحبيبه صخرناه=وفي غيرها لابوه لابو قوافيه[/poem]




[align=center]أمدها الله بالصحة و طول العمر على عمل صالح.. آمين[/align]