المشاركة الأصلية كتبت بواسطة ضيف الله بن سويلم
السلآم علـيكم ورحمـة الله وبركآته
يسعد جمـيع أوقـآتكم بالخـير ..
قصـيدة تعبّر عن حآلهآ :
أنا شقرت القاف ياحمود شقرا
ولاني بمن يشقر عصا الربع شقرا
والوشم تال الوقت سموه شقرا
والشمس لا حميت يذوب الجليدي
قالوا لي اهدا وقلت ماني بهادي
مادام فيه إشكال في دار هادي
ولا فيه غير الله للناس هادي
والأمر لله والحكي ما يفيدي
بغيت أقرّب لابن عمي وأبرّه
وانحاش عني مع صحاصيح برّه
والسوس جاء فالحب دخنه وبرّه
وصار القريب عن القرابة بعيدي
قالوا ترى العمدة كفو لو تمرّه
تلقاه فالواجب كما شيخ مرّه
واللي يذوق الحنظلة قال مرّة
ولا أحدٍ صرف شيكٍ بليّا رصيدي
وقالوا رفيقك جاه علمٍ وصرّه
وحطّه على ما قيل في وسط صرّه
وإن طوّلت جاء للمحاحيل صرّه
من يمنع الهاتف وساع البريدي
الوقت هو الوقت برده وحرّه
والأرض هي الأرض رملة وحرّة
ومن راقب العالم توفّى بحرّه
والموت يجري في عروق الوريدي
قامت تثور أتوام منّا ومنّا
وصارت مثل ما قيل منهم ومنّا
ولا أحدٍ خذاها غصب من دون منّا
لو فكّر إنه خالد بن الوليدي
إصلاح ذات البين غاية مرادي
اسمع كلامي جعلكم فالمرادي
نويت أشارك مير ربي ما أرادي
ولا أحد يسوّي غير ما الله يريدي
نرم الهدف بالمارتين ونصيبه
واللي يحوش الطيّبة من نصيبه
ومن مات حطّوا فوق راسه نصيبة
والمسعد اللي مات موتة شهيدي
حمود تسمع كلمته عند عمّه
والخير خصّ أشخاص والشر عمّه
البس لحل إشكال الاقراب عمّة
ولا فرق بين شنيف وابن حميدي
قانوننا يا حمود للشرع حكمه
وللعقل ميزانٍ وللشعر حكمة
والمحكم المنحلّ لابدّ حكمه
ومن لا رضي بالشرع يحسب بليدي
وسلامتكم
الله الله الله الله
اشهد بالله انك جامعة شعر
ماشاء الله تبارك الله
فن فن في كل شي طرق ومعنى وقافيه وشقر