يا منبر الشعر مصيـون عن مكثريـن الصياحـي
لا زلـت بالـودّ ممنـون مع كل خافـق جناحـي
شقرٌ تعلّت علـى الكـون ترقـب جميـع النواحـي
يجيرها الله مـن الـدون لو غيرها سـاح باحـي
والشعر هذا مـن قـرون عــدٍ زلال ٍ قـراحـي
ومع ان ّ عصر ابن لعبون ماهوب عصـر انفتاحـي
تسعينٍ بيـت ٍ علـى أون وتسعين بيت ٍ على آحـي
بيـوتٍ ظهـورٍ وبطـون ما بيـن حيـل ولقاحـي
واللي معه راس وقـرون يكسر قـرون الوضاحـي
ما باح للشعـر مكنـون فـي نعمـةٍ وارتياحـي
ميراثهم عند ابـن عـون والأكلبـي والريـاحـي
واليوم خدمـة فودافـون والبرق من شرق لاحـي
لكن ترى مقعـد الهـون ماهـوب مقعـد سياحـي
في كل شهريـن مليـون وربحـت يابـو رباحـي
خلاص مضمون مضمون أصبحت طيـر ٍ فلاحـي
طاروبك أهـل التلفـزون ثـم لبّسـوك الوشاحـي
وخلـوك نفـاخ بـالـون في كل حـزم ٍ براحـي
الوضع من دون في دون يا غبن عيني وأنا..حـي
نصف القنـوات مالـون يا لاح لاحـي ياماحـي
قصائـد أفـلام كرتـون شف عرضها مستباحـي
وقليّـل اللـي يـعـدّون هجـاد والا صبـاحـي
قدمـت للشعـر عربـون من جد ماهـو مزاحـي
هذا وانا اعرف من آكون لا ثـار ثايـر سلاحـي
مجنون مانيـب مجنـون لو كان مانيـب صاحـي
صح لسانك ياالمسري
ابيات كافيه
لك مني فائق الاحترام والتقدير
تحياتي
|