يابنت ياللي تجلسين أمامي = بطلبتس مطلوبٍ نزيه وسامي
إن كان لبيتيه فأنا شاكر= وكانك رفضتي ما عليتس الزامي
مقابلك منوة عيوني ، لكن = لاعاد أشوفتس جالسة قدامي
مانيب عايف مير والله خايف = عقب الصيام أضيّع أجر صيامي
وتقصر عن حبال النجاة يديني = وتزوغ عن درب الصواب أقدامي
وأعيد تاريخ الغرام الحافل = بصدق تجريحي وكذب أوهامي
وأكذب على نفسي وأصدق نفسي = وأهيم بتس واتبع سراب هيامي
أرجوك حليها ، وحلي عني = قبل تحلحل من حلاتس عظامي
مانيب ناقص هم ، همي يكفي = ولانيب طيّب جرح ، جرحي دامي
أنا عجزت أغض طرفي عنَّتس = الله يغفر زلتي وآثامي
جالس على الكرسي تقول محنّط = والناس من حولي تقول أصنامي
حاضر ونفس الوقت ماني حاضر = كني ( سراب ) وكن عقلي ( ظامي )
ماهوب حوفي حوف سحر عيونتس = يالله عسى من لامني ينلامي
آية حسن ، سبحان من صوّرها = بحسنها حطّمتي الأرقامي
ولو صار لعيون البنات مزاين = أخذتي الأول بدون خصامي
وإن ما حصل هذا ، فهذا يثبت = عدم نزاهة لجنة الحكَّامي !
يكفّي إني كل ما أناظرها = أشجّع أقدامي على الإقدامي
وأقرر أهاجر وأعيش بدارتس = وأقضي بها اللي باقي من أيامي
ويردني ( ديني ) وسلم جدودي = وحبي لدار ( السلم والإسلامي )
بالمختصر ما شفت مثل عيونك = طوي الكتاب وجفّت الأقلامي
وجمالتس الباقي ما هو حيالله = تحتار قدمه ريشة الرسامي
أنتي لو تزورين كذا دوله = ازدهرت سياحة بلدتس النامي
سويتي دعاية بدون دعاية = وفي رواية ( رمية بلا رامي )
( منتي بمن ياتي ولا يدرى به ) = على ما قال ابن فطيس اليامي
لا بالله إلاَّ جيتي ، وخليتي = أحلى البنات تنكّس الأعلامي
جمال ، أناقة ، ذوق ، حسٍ راقي = صوتٍ تقاسيمه كما الأنغامي
مدري وش أبا أعد ويش أخلِّي = هبّت صباك ، وفاح مسك ختامي
أشهد لك وهذي شهادة منِّي = وزودٍ عليها بصمةٍ لإبهامي
ما أحلى ولا أجمل من جنيف إلا أنتي = ياللي تهب بعطرتس الأنسامي
وتأثير سحرك فوق طاقة عزمي = حتّى لو إني حازم وعزّامي
لذلك وبالرغم من ما قلته = ( لا عاد أشوفتس جالسة قدامي )
لنِّي عجزت أغض طرفي عنّتس = وهذا هو الحل الوحيد أمامي
الله الله الله الله
كلها ذهب من اول بيت الى اخر بيت
صح لسانك يا مبهدع
اسلوب شاعر متمكن
وتنقل في الوصف بحرفنه وابداع
تقبل تحياتي يا مبدع
كذا الشعر والا بلاش
|