[poem=font="Simplified Arabic,4,black,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black"]
تعالي وروحي في شفا نجد ياشيّوب=معك ماشتهيتي من سويقه ليا ادنى خُرب
تمثني علاوي من كل حدب وصوب=وخليك في بحبوحته شرق ولا غرب
مربّ امهاتك عوج الارقاب والعرقوب=كبارالفوايد يوم ماللمعوشه درب
يدوسن رجعاناتها والحدب مقضوب=تحت شفّهن رثم الخشوم السهاف العِرب
تلادٍ تسلسل من عصور النبي يعقوب=على دربهن كمّ أبلجٍ حِط له في زَرب
عليهن يزود النيّ فالماقع المهيوب=ليا ربّعت ماينقض الجزو عنها شرب
عطاويّةٍ تزها الجنيبه بلا دبدوب=عليها المطارق وسم ماهي مطارق ظرب
وانا لو حدتني عنك الاشغال نوب ونوب=مصير الليالي يجمعني معك عن قرب
ليا بكّر الوسمي وجا للمزون نصوب=ودلاّ طفلها والنفيض سبقنّه هرب
نهاره وليله بارقه مشعلٍ مشبوب=ودويّ الرعد غارات سربٍ وراها سرب
ليا قمت اخيله قام شوف العيون يذوب=يذكّر عليّه ليل بغداد فاتلى حرب
أخيله واردد قول ياحي يامطلوب=تغيث البلاد بجاهزٍ ماه كفوة غرب
سبوعين لين يبدّل الحزم ثوب بثوب=سواة الزوالي في مجالس ملوك العرب
يزين التمشّي مع خطاة البكار العوب=بعد مسّنا من وطية الوقت حزن وكرب[/poem]