[POEM="font="Arial,5,seagreen,normal,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]الشعـر قصّـة غريبـة في تراكـيبه=مرّات يا سهْــله ومرّات يا صعْـبه
بعضه ليامن كتـبته جتـْك تعصـيبه=ما تقتـنع به وبعض اوقـات تقنع به
واحيان تـقعد سنـه ما تقدر تْجـيبه=واحيان من دون أي مجهـود تبدع به
تحتــار ما بين ترغـيبه وترهـيبه=مرّه يجـي فـارس ومرّه يجـي لعبه
تحبّـه فـ باطنك وتقـول أباسـيبه=وليا تركـته يجي مطلع وتطـلع به
كل ما تباطيت معْـه تْشوف تقـريبه=للأحسن أكثر.. ويبعد حين تسرع به
ما تعـرف الراحـه إلا بعد ترتـيبه=واكبر مصـيبه ليا صرت اتّصنّع به
يا كثر ما خلـّد أسمــاءٍ تغـنِّي به=كانت تقـوله ولين اليـوم نسمع به
من كثر ماهوبـ ذاك الوقت له هيبه=نـوادره كانت تْعـلّق على الكعـبه
يسرق فكر صاحبه من بين أصاحيبه=جالس معاهم وفكره فـوق يشلع به
تقدر تضحّـك به و تقـدر تبـكّي به=تقـدر تـنزّل به .. وتقـدر ترفِّع به
تقـدر تزعِّل به وتقـدر تراضـي به=تقـدر توصِّـل به ارحـام وتقطِّع به
من ضمن بعض التواءاته واسـاليبه=تدفن به الـذَّم بالمـدح وتخـادع به
ان قلـته لصـاحبك كنك تهـنِّي به=وان قلـته لـ حاسدك كنك تخرِّع به
بخـيل وليا عطاك تقـول وشْ طيبه=كريـم وليا أخـذ فـرَّغ لك الجـعبه
عنـيد وان هـادنك تبشر بترحـيبه=حبـيب وان عانـدك صعبه تسنِّع به
ولإبداعه احلى حضور ان كنت في غيبه=متغرِّب وقلبك هـمومه تجمَّـع به
الشعـر تعذيب لكن حلـوْ تعـذيبه=والواحـد ليـا تولـَّـع به تولـَّع به[/POEM]