المجد ما هو بالسوالف

لا تنشد عن الحال بين مثل ما عينك تشوف
صابر على حكم الليالي ما شكيت ظروفها
وقفت في وجه الليالي ماتعبت من الوقوف
من شان ناس جعل روحي فدوة لونوفها
لا يا حسافة صاروا أصحابي علي مع الظروف
لو كنت اشيل حمول ناس ما اسعفتها كتوفها
بعض الكلام أقوى على الرجال من ضرب السيوف
لا صار من ناس تكن لك الغلا في جوفها
لا ياتعب ما انته على ما قيل دايم بمخلوف
تعبت ما حصلت والدنيا تشح كفوفها
المجد ما هو بالسوالف والدعاوي والحلوف
ما نالته قوم على شانه تسل سيوفها
ولا نالته قوم سعت له بالركايب والصفوف
من قبل لا تدرك هواها ادركتها حتوفها
يا كثر خلق ما تكفيها المدايح والوصوف
اليوم ماودي بطاريها ولا ابغى شوفها
احتاج لكني ما ادور حاجتي عند الضعوف
انا غني عن جمايلها وعن معروفها


ضيف الله صح لسانك على هذه الرائعه

قصيده تكتب بماء الذهب من اول حرف لآخر حرف 00

تقبل خالص الود والتقدير ياصديقي الغالي00