’’ وصــاه ‘‘

السلام عليكم ورحمة الله وبركاته



ارجو ان تحوز على اعجابكم هذه القصيده


[poem=font="Simplified Arabic,4,black,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black"]
الرجل لاسافر وحِفْظَت وصاياه=لوقيل غايب قلت موجود ماغاب
والقاف يازينه ليا زان معناه=بمناسبه وألا على راس مرقاب
بعد صلاة الفجر وِصِّيت بوصاه=على شبوب النار مع هجّة الباب
وليا ركعت الفرض في طاعة الله=بدلت لي عن نوم ندهان هنداب
ياقوم نوم الصبح مانيب ويّاه=وقتٍ به الطلبات والكسب ينجاب
وقتٍ يفوق الوصف باهي وما أحلاه= ظلٍ مديد ومَكرمَة كل طلاب
فيه الغنايم للرجال المحيّاه=طلابة اللي من ترجاه ماخاب
نوم الضحى ياناس لو زان ما أبغاه=لا ترقدونه يا عريبين الأنساب
مايرقده رجّال يقلط بيمناه=نومة خبولٍ خالفوا سلم الأنجاب
يازين فيها شبّة النار زيناه=والكيف لن جوا له مع الصبح شيّاب
ويازين فيها رقصة النجر وغناه=لا سمعه الشايب بزعمه يجي شاب
رقصه ولعبه يشرح الصدر ونداه=يجون له ربعٍ سوالفهم عجاب
أهل حديث ونصح وعلوم ورواه=لو هم بدايد كنهم ربعٍ أقراب
ونجرٍ ودله فوق نارٍ مسواه=وليا تلافوا صوبها خاطري طاب
جابوا علوم الغيث من كل مجهاه=ليا تراكم في السماء كنه هضاب
وليا سرى برق الحيا وانهمر ماه=وعدّوه من جده ليا راس مشعاب
وحدّ المعلّم قال نجران وأقصاه=وإسبوع والربع الخلي ماه صبّاب
ومن الشمال طريف سيله تغشاه=والقاع لبست ثوبها الزين وخضاب
لبست لها مثل الزوالي محنّاه=وزانت غطاريف أم سالم بالألعاب
فيها يطول العمر ويطيب ممشاه=لافاح طيب العشب بأنواع الأطياب[/poem]

..