مفاتيح الكلم !

عسى ان ترتقي الى ذوائقكم .,

[poem=font="Simplified Arabic,5,black,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black"]
ياليل لو ماثمنت روحي جمايلك وعطاك = ماكان من بدري تقاسمنا البساط الاحمدي
ياليل يوم ابدي عليك اسرار قلبي من غلاك = لاتنتحي عني وتتركني للامر بمفردي
انت الوحيد اللي له الحق يتمتع بأنتهاك = ماطاب له من زاكي آلامي .. ومن فيض جهدي
معك اقتل شعور الخجل .. واغتال عمر الارتباك = واجرّ صوتي لين احرر كل قيد ٍ في يدي
الله عطاني من مفاتيح الكلم .. والله عطاك = رحابة ٍ تملا مقام سهيل في عين الجدي
على جبينك كل ليله ودّي افض اشتباك = جوارح ٍ بالوجد تمشي بي .. وبالهم تعدي
مالي ملاذ امرر اوجاعي على متنه سواك = وانت اجودي .. لكن ضيق النفس ماهوب اجودي
يضفي علي من العنا مايملك الحال امتلاك = في حينها بدءاً بروحي وانتهاءً بجسدي
اصبحت مابين التعب والضيق كني غصن راك = اقلّ شي يبيّن اوراقي .. ويخلف مقصدي
لله ياقلب ٍ كثر ما اعطيت من صدق اعتراك = جرح تهادى بك على درب الغياب السرمدي
في ظل عاتية الرياح .. الصبر مايقوى الحراك = والعين عيّا دمعها للحزن الامثل يهتدي
مافيه شي ٍ يجعل الانسان عرضه للهلاك = الا الشجاع ليا استطاع ..وخانه الحظ الردي[/poem]