الليل لو يشكي على طلة النور

[poem=font="Simplified Arabic,6,darkblue,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black"]
الليل لو يشكـي علـى طلـة النـور = كان اشتكاني مازعجه غيري انسان
من كثر ماحكي له وماشكي من الجور = وافضفض همومٍ بها القلب مليان
أشكـــي زمانٍ بدل الصدق بالبور = تغيّرت فيه المبادي والالــــوان
وأشكي عليه الحال والحــال معثور = حالٍ طـواه الهم من ماض الأزمان
ضايع مع الأيام تايه ومقهــــور = والحـزن له بالقلب ملجأ ومسكان
بنى له بقلبي عمارات وقصـــور = واستوطنه حتى غدى كله أحــزان
وأشكي رفيقٍ ماله احساس وشعور = مخطي طريقه يسمع فـلان وفــلان
يتبع هوى نفسه وبالنفس مغرور = ويعـــدّ نفسه من طويلين الايمان
دمه ولحمه باعهم ضايع الشــور = باع القرابه كلهم بأبخـــس أثمان
وأشكي من اللـي بدّل الحق بالزور= يشهد بغير الحـــق ويغض الأعيان
يمشي على غيّه ولاهوب ماجـور = بايع ضمــيره يحسب انه كحــيلان
هذاه أنا والليل من عدة اشهــور = أصبح ونيسي والسهـر صار عنوان
أسامره والقلب ماهوب مســـرور= ماكنه الا عايشٍ فــــوق بركان
ويصبح علـي الصبح ويقول مشكور= مشكور يامزعج هدوئي بالأحـزان
والليل لو يجبر عزاء كل مكســور= كان السعادة ساكنه كل الأوطــان
والليل لو يكشف غطـاء كل مستور = كان الأوادم عنه عاشــت بكتمان
لكنّ اهو ستر الخلايق مـن دهــور= وملجأ لمن هو يشكي هموم وأشجان[/poem]