الفقر ... !!!

السلام عليكم ورحمة الله وبركاته




تقبلوها كما هي ::


\


\


\


[poem=font="Simplified Arabic,5,blue,bold,normal" bkcolor="transparent" bkimage="" border="none,4,gray" type=1 line=1 align=center use=ex num="0,black"]
الفقر ما هو فقر الأموال يا خوك = الفقر .. فقر النفس يوم القيامه

لا متّ شف مغلينك بويش لفوك = انته مع اصحاب المعالي .. بخامه !!

وقفوا .. على كثر الغلا لك .. وخلوك = وحدك بقبرٍ معتمٍ في ظلامه

تسمع خطاوي مشيهم عقب حطوك = يوم الندم ما سرّ راع الندامه !!

أعمل لأخرتك وقدم لها صكوك = ما دام تو جسمك تشيله عظامه

وأهل المصالح والفتن لا يغروك = ما كل سلامه جايب ألك السلامه !!

وأعرف ترى كل درب من قبل مسلوك !! = يعني أعتبر من لابسين العمامه

وترى ما هي عيب ٍ ليا من ّ دلوك = العيب تمشي درب تجهل نظامه

ولا تلتف عينك على ناس سبوك = كل ٍ بمقداره .. مثمن كلامه !!

وان لزّموا بين الخلايق وحدوك = لا تتعب اعصابك .. ورد بإبتسامه !!

لان العرب لا جادلك خبل .. ساووك = وحطوا مقامك في مكانة مقامه !!

عابوه في هرجه وفكره .. وعابوك = عاد أنت أخذ من العتب والملامه !!

ودام البشر .. نوعين حر ٍ ومملوك = ( المحترم يفرض عليك احترامه )

وترى القناعه كنز ما دونها شكوك = ياعي لها راع الفكر والفهامه

يعني ترى ما هوب كل شي مدروك = كل شي بيد اللي يسيّر غمامه

وأحسن لمن أحسن .. ووف ناس وافوك = الطيب يبقى في زمنا علامه

وخل العرب لا مت بالخير طروك = الذكر .. يرفع للمخاليق هامه[/poem]



وسلامتكم ...