(( الـديــون الــعـــراقــيــه ))

السلام عليكم ورحمة الله وبركاتـه

قصيده اجتماعيه من الجديد .. وأعتذر عن غيابي لضروفي الخاصـه ..
ومهما غبت انتو على البال


بسم الله عليتس امن الشراذيم والتأزيم
ــــــــــــــــ ومن مجلس الامه ومن بايع الذمّه

ومن نكسة التدوير وامحلل التحريم
ــــــــ ومن شلّة التبصيم ومن حزب ابو عمّه

ومن عرقلة الاسكان والطب والتعليم
ــــــــــــــــ ومن فتنة مفعولها الذم والنمّه

ومن شاشة التلفاز والنقد والتسويم
ـــــــــــ مقاييسها خمه تسولف على خمه

ومن صحف يوميه ومن عالم التوهيم
ــــــ ومن جيّة امطمّه ومن روحة امطمّه

يادار الرخا لو يكثر العبث والتجريم
ـــــ مايجحد عطاتس الا الدراويش والرمّه

تعبنا وحن في حال مايقبل التلويم
ــــــــــ نجامل ونعفو وانتسامح لجل الامه

ياكم ندمح اخطاء الغير وانبادل التكريم
ــــــــــــ بالاكرام والتقدير من عالي القمّه

والاخوان في بغداد ينوون بالتقسيم
ـــــــــــــ يحسبوننا جالٍ على صافي الجمّه

متى ماوردو يروون من مايح الكريم
ــــــــــــ وذا يصفط لخاله وذا يصفط لعمه

الاولى الحدود اللي خذوها بلا ترسيم
ــــ والاخرى الهجاد الليّ هدر وانسفك دمه

والاسرى وقتل الابرياء واحتلال وضيم
ـــــــــــــ وسبعة اشهورٍ فرقة جمعة اللمّه

ورجعنا وشيدنا المباني بلا ترميم
ــــــــ وجحدنا المواجع لجل مانخذل الهمّه

ودعمنا العراق بطيحة الحزب لجل ايقيم
ــــ وشحذنا الهمم والشعب بالشعب مهتمه

وذالحين بعد اللي بنيناه من تقويم
ـــــــــــــــ جحدنا وعوّد راعي الكبر للزمّه

يطالب بطرح الدين ويعاود التفليم
ـــــــــ بعد ماحتسى كيفه وكيّف من الشمّه

رسى الامر عنده يحكم اديارنا ويهيم
ــــــــــــــــ غبي من غباوة كاوليٍ يطق امّه

يحسب اننا مثله دنيين سيم وسيم
ـــــــــــ مافينا ولاء واللي يبي لازم ايتمّه

ضعيفٍ غواه الكبر والسان ابو تلقيم
ــــــ ايعرّق على خشمه ويحثى على فمّه

خلصنا من الصفطان واستقبل التعميم
ــــــ مايرضى الهوان امحنكٍ قوله ايتمّه

ياداري عليتس امن التحيات والتسليم
ـــــــ مايرضيتس ويخليتس ترقين للقمّه