للوطن وإن رغمت أنوف !!

للوطن والوطن فحسب ..

أتمنى أن تشفع لي الغياب

رفرفي ياراية العز والمجد التليد
واسطعي بالنور واضوي دياجير الظلام

والله انك ياجناب الوطن ركنك شديد
ووالله انك ياتراب الوطن فوق الغمام

كل يوم ويوم ياموطني قدرك يزيد
اشهد انك فوق كل الهقاوي والكلام

انطح العليا وقل للعلا هل من مزيد
دام قدرك ياوطنا رقا راس السنام

بين حاضرك المشرّف وماضيك المجيد
انحنى التاريخ من هيبتك والقى السلام

سخر الله لك رجال ٍ لهم راي ٍ سديد
خصّهم بك رب الارباب من بين الأنام

أهل العوجا هل الطيب والفعل الرشيد
الكرام مضيفين الكرم نسل الكرام

حبهم في جوف الاخيار يجري بالوريد
وقدرهم بقلوب الاجواد باني له خيام

ياإله الكون يابادي الخلق ومعيد
يامدبر بامرك الخلق ياكاسي العظام

يالله احفظ هالوطن ياعزيز ٍ ياحميد
ويالله احفظ له رجاله عزيزين المقام

ويالله انك تشفي اللي عسى عمره مديد
شيخنا الصمصام ابوخالد القرم الهمام

عيدنا يامحيي الأرض يارب العبيد
هو مجيّه طال عمره وهو بخير وسلام

والوطن بقلوبنا ياعسى عيده سعيد
وياعساه بزود تمكين عام ٍ بعد عام

ويا إله ٍ تفعل اللي تشا واللي تريد
اقمع اهل البغي واهل الفتن واهل الظلام

وياجناب المملكة والله انْ ركنك شديد
ووالله انك ياتراب الوطن فوق الغمام

قديم الشوق