... ثرى الطهـــر ....

رضيت بصدوف المقادير ياسعـود
لـو انهـا كبـر الجبـال المنيفـه
دام التعب منسي عسى يسلم العود
واليا سلم كل الدعـاوي خفيفـه
مافالصبر والحلم والصمت منقـود
بكره يعيـش الحلـم والا بكيفـه
لو لا الحيا واخاف شرهة هل الجود
كسرت مـوال الربيـع بخريفـه
وحثيت رجل الهجر لمصافح النـود
وخايلتلي بـرقٍ جذبنـي رفيفـه
ماني على طـرد المقفيـن محـدود
ثقيل ..ودروب الرزايـا مهيفـه
ولجي مكانٍ فيـه شكـه ومنقـود
ولخذت موال القصايـد وظيفـه
جندي وطن وان صار شعله وبارود
ارخصت روحي لجل عين العفيفـه
داري ودار اباي والعلوم مـردود
من دونها بيض الحـداد الرهيفـه
حتى ولو شحت علينـا بعنقـود
اعيونـا عـن خاملتهـا كفيفـه
يادار وان جينا على النقص والزود
حنـا عيـال منزهيـن الشريفـه
لنا سنام المجد فـي سابـق الـرود
واليوم خطوتنـا بكفـك كليفـه
خفي على قلوب المحبيـن بالهـود
يكفي الزمان اللي زهدنـا رغيفـه
شابت لحانا والنتيجه بـلا فـود
رصيدنا بـس النوايـا النظيفـه
ولاهمنا لو نقضي العمـر بوعـود
بس العلم يبقـى ويبقـى رفيفـه
نموت مابعنا ثرى الطهـر بنقـود
لو انهـا تبقـا الحيـاه الكسيفـه



الله الله

ابوحميد ماقريت لك والله اجمل وافضل من هذه الباسقه التي تعانق الغيم معنا ومضمونا

صح لسانك
تحياتي واعجابي الصريح المتجدد