صباح الخير ياهل المرقاب

راكب الي ما لقـينا له مثيلن فالنجايب
بالفخامه والعزوم وسكبت المنظرندينه
لوتجـيه ولو تديره ماتحصّل به شوايب
كاملن والكامل الله في تواصيفه وزينه
حي أبو مجنى مصمّم عزوتي عند الندايب
ياعسى فاله سعيد وياعسى تسلم يمينه
كل ماعاينـت قطعه ياعجيب وياغرايب
قلت سبحانك إلاهي خالق الي خالقينه
وارد الفكسار توّه من جديدات الجلايب
من بلاد الشرق شركات الجيوب مصدرينه
كمّلوا قيمة رسومه وادفعوا كل الظرايب
وفوق بابور البحر شدّوا رحاله ناقلينه
ووجهوابه يمّة القبله على حسب الطلايب
ووفّـفوابه داخل المينا حراوي طالبينه
لـين جاهم من يقول انه عن الشركات نايب
وماطلع من عندهم بالكرت كود مجمركينه
ثم شدّواله على سطح التريله بالقـضايب
صوب نجـد وشركة التويوت جوك محملينه
أشهـد انه معجـزة ذا القرن ومصيبة مصايب
يكـفي اليـابان فخـرن دام هـمّ مصنّعينه
والـخـواجه منصـفـق وجهه يذوق المر رايب
كـل ماشـافه يصدّ بعـيـنه الشمطاء غبينه
مـنـطوي طـي المريض ومونسن حر اللهايب
كـن ظـربت هـوريشيما ردّها اليابان دينه
وهـونج بـونج يمـزّعـمره لين عداه النصايب
مايلدّ لباقي العالم يكود بنص عيـنه
مانـلومه لاوربي كاسب كل الكسايب
منـتج الفكـسار لاهل الكـار دوم موردينه
مـاورد لـجل البهـايم والاّتحـميل الزهايب
عـن هـذولا مـع هـذولا نايـفن ومحشمينه
ولاركـب فـيه المسـفّه والجـحلط والزلايب
ولامسـك مقـوده هيـسـن ديننا مهوب دينه
وارد باسـم الـرجال الـي يفـكون النشايب
كنـهـم عـقب الصنـاعه للنشـاما واسمينه
إن مـشى بيـن المواترمشـيته مشيت ذرايب
ماتقـول الا الأميـر الي جنـوده حارسـينه
وإن وقـف وقـفـة فريق يختطب قدم الكتايب
توّمـاصدّر قـراره للـقـيـاده ناصبـيـنه
كـن لـونه لون غروا تحت ضو الشمس ذايب
من بيـاضه تحسبن الشمس تشرق من جبينه
ورزتـه راس البعيـر الـي من الازوال هايب
يـوم قرب مـن المعـشّا وقفّـواله محرمينه
وكن بيـن محـركـاته تحـت كبـوته حرايب
ورغـم ذلك لوتسـمّع ماطـلع صوت المكينه
ومنظـر الطبـلون مـن هـوله على الناظر عقايب
يحسب إنـه كنـز بالالمـاس والـدر الثمينه
والجنـوط مـع التـوايـر يـوم احلّيـها طرايب
وجـه قمـرا لبسـة البخنـق ولفـتها متينه
والمـراتب كـنها حـظـن الهـنوف ام الذوايب
جادل من حسـنها كـل الـنـشـاما خاطبـينه
وشيـفـت انواره تحالي شبـحة عيـون الربايب
لاقـبـس نوره تقول من الكهارب شـاركينه
والمـرايـا فـوق بابيـنه تجـيـب العلم صايب
مستـشـارينه مع اللـفات وطـروق المدينه
وأيـرباقـاتـه لاقـدّر ربـنـا ...عند النـكايب
ظمتك ضـمّت ضنـين مبطـي قابل ضنينه
يانـديـبي وانت قـرم تاخـذ السمـعه غـصايب
بالمكـارم والمعـارف والجمـايل خابـرينه
ناصحـن منتـه بمثـلي غـرني شـوف السحايب
قمـت اخايـل نوّها وارقب متى يمطر وحينه
مـادريت ان السحـايب تحـت تصـريف الهبايب
كـل ماهبـت هبوب ساقـتـه مثـل السفينه
يازمن وش عـاد باقي؟ يازمـن ويش انت جـايب؟
كـل ماقلـنـا تـزين تـزوّد البـله لطـينه
كنـي الي مـن صوابه صـفّت ضلـوعه حطايب
ماتجبـرها الجبـاير فالمشـافي راكـنيـنه
ساهـر ليـله يـونّي والـكرى ماهـوب طـايب
لاأنيـس ولاجليـس ولا عــوينا له يعينـه
يانـديبي يانـديـبي دوك خـطـي والكـتـايب
وصـلّه شكـر جزيــل وبيت شعر ناظمينه
يـاسـعـود امنـتـك الله لاتـدّور للسبـايب
خـل ابن عمك وسـر مانـوى يكشف كنينه