ياللي تسوم الوضح ماهيب للبيع ..!

[poem=font="Simplified Arabic,5,black,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]
ياللي تسوم الوضح ماهيب للبيـع =اللي يوسـع خاطـري لاتسومـه
دور وتلقى البيع عنـد الطماميـع= اللي تصفـي كـل يـومٍ بيومـه
ويش اتسلا بـه ليـال المرابيـع= لا نـاض بـراقٍ ثقـالٍ غيومـه
لاقالوا الحاشي علـق فالطواليـع =والسيل عساسه عطانـا علومـه
بين اهجر العجمان ومطير وسبيع= عشـبٍ تفتـق للعشايـر كمومـه
عشبٍ يجيله فالمسـارب تناويـع= من قطف زملوقه ماهيب امحرومه
نبـي نخليهـا تـذب المخاويـع =ونقدالها مقهورهـا فـي يمومـه
من قصر ابن ملحم معش المجاويع =اللي تسابـق للفضيلـه عزومـه
من سيرته فيه المدايـح مطاويـع =ومن يمدح الممدوح مااحدن يلومه
للبال عنده كل ماضـاق توسيـع= الله يوسعلـه ويبـطـي بيـومـه
يفدونه اللـي ماوراهـم مطاميـع= جندن طرايقهم ماهيب امهضومـه
نوعيتن مامـن وراهـا منافيـع= تجار لاشـك اليديـن امحزومـه
وضحٍ بعد مقياضهـا فالمشاريـع =ماشط من بعـد المعشـى تهومـه
لاروحت مثـل البنـي المفاريـع= وعيالها خلف الرحول امحكومـه
تنسف على ايسرها خشوم الترابيع= والعتش الاول تنزعج مع ثلومـه
ناخذ من السجات معها قراطيـع =لين امهموم القلب تذهب همومـه
تطرق عمايمنا هبـوب الذعاذيـع =ونلقى حياتٍ فالقصـور امعدومـه
لاقربت صفـر الـدلال المهانيـع= وغدابهن لمخلط الكيـف عومـه
في خايعٍ فيه الزبيـدي مصاليـع= والربل والملاُح كاسـن احزومـه
هذا هوى بالي وبـاق المواضيـع= النفس عنـه مقيـده وامخزومـه
والرابح اللي مدركن ذبت الريـع= وله سمعتٍ عند الرجال امحشومه[/poem]

عبد الله بن عون