فضه وذهبه !

يا معيض الإبداع كونٍ راحب الانفتاح
ظلوم من يحصر الإبداع في تجربة

إن قلت ضيدان قلت الهاجري وين راح
وإن قلت نايف صقر قلت لك يا معذبه

وإن قلت حامد وابن علوش قلت السماح
هو من هو اللي سعد جدلان ما يعجبه ؟

وإن قلت الأسماء كثيرة قلت الأسماء سلاح
من لا عرف كيف يتعامل معه يعطبه

تمجيد الأسماء لأجل تكريس كبح الجماح
اسلوب ماهوب ذا وقته ولا مطلبه

ولاَّ زمان الريادة واحتكار النجاح
والفضل ماهوب للموهوب للموهبة

لو إن أبو زيد ريح فاطره واستراح
ما كان للموس عرّض لحيته وشنبه

يقول ما نرفد إلا كل عذبٍ قراح
وأقول منته بلاقي ضاميٍ يشربه

وأنا قصيدي رصيدي في القلوب الصحاح
ما جيت به لأجل في صم الآذان اسكبه

يكفيني إني نسجته من خيوط الصباح
وحوّرت به كل فضة في الكلام ذهبه

جيشته لخدمة النهج السوي والصلاح
وحاربت به كل فكرٍ ذاهبٍ مذهبه

سفينته لو عصتها عاتيات الرياح
عن شف سفَّانها ما طاح منها خشبة

ويا معيض قله حرام إنه يحرم مباح
ورضاه ماهو مهم أخسره ولا أكسبه

النحل ينتج عسل والداب سمٍ ذحاح
وبين الثرى والثريا وين وجه الشبه ؟!



معيض = مصاص دماء كرشمي !