غب ,, ياقمر

[poem=font="Simplified Arabic,5,black,normal,normal" bkcolor="transparent" bkimage="" border="none,4,gray" type=1 line=1 align=center use=ex num="0,black""]
غب ياقمر .. ماقصر غيابك الليل = ولاتزيده في حضورك .. ثواني
قبلك وبعدك يطلع الجدي وسهيل = وبكره تباا تبدي على ليل .. ثاني
شوفك يذكرني بحلو المواصيل = وغيابك غيابك .. وانا في مكاني
عليك مبدأ العلم .. والا التفاصيل = على طروق القافيه .. والمعاني
الجادل اللي له بقلبي مداهيل = أخلااا مكانه بين عوج المحاني
لباا عيونه والرموش المظاليل = ولبااه كله لو بهجره .. كواني
العام نزلته .. كرامه وتفضيل = على جميع الناس .. قاصي وداني
وأشعلت له براق .. وأجريت له سيل = وبسطت كف محققات الاماني
وزرعت له في وسط قلبي محاصيل = والشوق له يرعى الغلااا في كياني
وأرهيت له لبيييه .. وأمرك تساهيل = ولاقلت له .. مقدر ومابه وماني
يأخذ ويترك والمشاعر مباهيل = وموَرده ودي .. وصافي حناني
ومطَرفه عن كل شكه .. وتأويل = ومعلَمه .. باني معه ,, لابغاني
هذا وعدل الوقت مايشبه الميل = للوقت دوره .. والزمن قلباني
دار الزمان وكثَر الحط والشيل = وساعة فقدني .. ماصبر واحتراني
ماعاد لي حيله .. ولاعاد بي حيل = غلااهـ وداني بعيد ونساني
بيني وبينه .. ماتروح المراسيل = ولاتمرهـ .. كلمةٍ من لساني
غاب وغيابه زااد من ظلمة الليل = وأنا .. بغيت أجيه والصبح جاني
ولاعاد باقي شيء ينقال ماقيل = ولانيب رايح له .. وهو مادعاني
[/poem]