عين المساعي !!

[poem=font="Simplified Arabic,5,black,bold,normal" bkcolor="transparent" bkimage="" border="none,4,gray" type=1 line=0 align=center use=ex num="0,black""]
البارحة طيّر من عيوني النّوم = شيٍ ورا عوج المحاني مقرّة
يكفخ بجنحانه ورا الصدر ويحوم = واليا وقع جا له على الحوم كرّة
همٍّ ثقيل وغير لو كلّي اهموم = كمّل على اللّي ما بقا من مسرّة
خلّاني اعاف الكرى تقل محموم = باسباب وقتٍ يكفي الله شرّه
وحظٍ على معكازه ايطيح ويقوم = الكحل في عين المسّاعي يذرّه
قزّرت ليلي ضايق البال مكتوم = ارخي حبل صلف الرّوابع واجرّه
شردٍ لها مع هاجسي خطّ مرسوم = ترقا سنود وتعتلي فـ المجرّة
يشتالها فكرٍ عن الهابط ايشوم = ينقى من الجزلات لله درّه !!
اليا هبط سوق الغلا يفرق السّوم = مرّة ولاكن عن ثلاثين مرّة
البارحة من حرقة الصّدر معزوم = على ضيافة جرح قلبي وسرّه
قلبٍ غداله فالهواجيس كم يوم = اليا دله جاته على حين غرّة
ما يلحقه منّي تشرّه ولا لوم = على مدار العمر : حلوه ومرّه
الّا ليا قصّر عن الحجّ والصّوم = وقام يتهاون في صلاته وبرّه
صحيح ماهو عن خطاياه معصوم = لاخطى يتوب وتوبته مستمرّة
ولا هو على طرد المقفّين ملزوم = في ذمّتي ماهوب قصّاص جرّة
يصدّ عن وجهٍ به الكره ويزوم = وعلى مجالسة الرّخوم ايتشرّه
قلبي وانا عندي تقاليد وسلوم = المجلس المشبوه والله ما امرّه
ما يصلح الحرّ النّداوي مع البوم = الحرّ نظراته بعيده وحرّة
والبوم نظراته قريبة ومذموم = ما يملك من العزّ مثقال ذرّة
يفرح لا قالوا له تريّح ومخدوم = أدنات شيّ من المصاعب يضرّه
خطو الضعيف اموالي الفرس والرّوم = اليا اقبلت بيض اللّيالي تغرّه
لا ملبّيٍ نخوة ولا مانعٍ قوم = ولا جالبٍ من قاعة البحر : درّة
هاذي خصايل واحدٍ يذبح الكوم = من جاه يلقى عنده اللّي يسرّه
اليا تكلم ما لوارده ملطوم = تجاربه في بحر كونه وبرّه
شيخ الفعول اطيب من الشّيخ ابو ختوم = ما جامل اخساس القلوب المكرّه
ماهم سوا والنّاس : معطى ومحروم = والله بيده المنفعة والمضرّة
لولاه ما يصحى من النّاس مصدوم = ولا عادت اله احواله المستقرّة[/poem]

هزاع الشيباني