اطلق شنب

قولي وش الي في خفوقك وسميه=يبقى الغلا سامي ومغليك سامي
الي على بالك لغاليك قوليه = مابيني وبينك حلال وحرامي
عمر(ن)جديد وجمر الاشواق يحيه=ويموته صومك ويفرض صيامي
رغم ان قلبك بالمحبه محتيه = وسميتك اسم غير كل الاسامي
لا شح وبل الخير من دون ارضيه=ماورد الضامي على جال ضامي
من عيلم ابداع القصيد ومعانيه=اجمع خلف واجمع رشيد الزلامي
واطلق شنب من دله الشعر اقهويه=والا البقيه ماتثير اهتمامي
شاعر يغنيني قصيدي واغنيه=انحت على صخر القوافي غرامي
ويكفيني اني كل ما قوله اعنيه=ومبأدي ماتختلف عن كلامي
اسرح الخافق بحبك واضويه=واحفظ مقامك قبل لااحفض مقامي
منزلك من قلب المولع محانيه=ضيف(ن)كريم وفي ضيافه كرامي
ضيف(ن)نزلت الدار واصبحت راعيه=وحدك مسوي بالشوارع زحامي
كنك تبي قلبي بكيفك تربيه=ومشكلتي اني مااعترف بالنظامي
اذا بسوي شىء عادي اسويه=انا كذا من يوم سن الفطامي
عشق التمرد في عايش وانا فيه=مابي يغرك في غلاك التزامي
صبرك علي شوي والشوق اخليه=يكحل عيونك وتنسى المنامي
واما عشقتي علي والا عشقتيه=دام الهدف سامي ومغليك سامي