أبيات في وصف الخيل ،،،، شاركونا لو سمحتم

[poem=font="Simplified Arabic,6,green,normal,normal" bkcolor="transparent" bkimage="" border="none,4,gray" type=0 line=0 align=center use=ex num="0,black""]

بدعت المثايل والمثايل لها بيبان =إلى فتحت بيبانها جاك مافيها
على القصد والمقصود بعدل القيفان=عسى راع البل عند ذوده يغنيها
يغني بها في خايعٍ عله الودان =بذيك النفود اللي عسى الغيث يسقيها
تهشم ربابه من طريف إلى نجران=مداهيل عوج السوق ربي رضا فيها
تشوف الخزامى و الشقارى مع المكنان =تخالف زهرها ساكناتٍ ذواريها
تكبر قياع الرمث من زاهر الحوذان=كساها ولي العرش وأحسن كساويها
مداهيل حلوات اللبن خلقة الرحمان = مجاهيم سود خالق الكون مسويها
مجاهيم جاذبها الفحل والوجيه زيان = وساعٍ مرافقها طوالٍ خطاويها
جليلات عظم الساق مرفوعة الحجان = طوال الرقاب مشرهفات أذانيها
عراض الخدود اللي تماري بها البدوان =كبار الفقار موسعة صدر راعيها
مجاهيم رمليات لخشومها نيشان=ترافض بلا دمها حدادٍ نواصيها
هوى القلب خطوى نايفة والضلوع متان=تجي بالحلا والزين وترد به فيها
كبيرة مزر الورك فجحا من السيقان = تخنطل قوايمها كبارٍ مواطيها
تمايح بذبلٍ مثل دراهة القران=نهار الطرب هذا لهذا يوديها
لها غاربٍ متقدمٍ شامخٍ مليان = يدافر حباك العيز والعيز حاليها
وساع منادغها من الزور للكعيان = بها كل شيٍ زين والملح غاشيها
طموحٍ تحذف أشناقها واسعة بيعان = فروعٍ فتون البيد عسمٍ أياديها
ولا رايعت كن المعنق على رمان =تعوجه من العاتق خفوقٍ لواحيها
سنودٍ من الغارب فسيحة من الذرعان =عسى ربنا من شر خلقه ينجيها
البل تراها السود والصهب يالظفران =وشقحٍ سواد اذيالها فاصلٍ فيها
أنا احب شوف الوضح وضاحة الألوان = مغاتير من جلد الوضيحي تحاليها
مغاتير جذابات ومكحلات أعيان=جميع الوصايف كلها كاملة فيها
مغاتير فنس خشوم فيها الدريعي بان =عرانينها وشعوفها فاصلة فيها
مغاتير معروفات وطبوعهن زيان =على الصوت ماتبغي راعي الصوت يتليها
الى شفتهن رتوع في خاطي الجيان =تشادي القنوف المرسية بامر واليها
مغاتير لامن سمعت الصوت والدندان =لاكن الذيابة تهتوش عند تاليها
مغاتير لاغنى المغني على عليان =ضربها السطر لا صاح بالصوت راعيها
الى جلعت لاكنها شرد الغزلان =وراها المفرد يابساتٍ علابيها
الى من ذعرها الصوت واستولت الميدان =يقوس ذرايب عجها من سماريها
ركد عجها من سجها والجرس رنان =تجي ذي مع هاذي وهاذي تباريها
ترى البل فرح وسرور من خلقة الإنسان =عسى الله يبور بواحدٍ بايرٍ فيها
كنوز البداوة منقذه راعي البستان =مواريث جدود باشهب الملح تحميها
مداخيلها عسرة على بايع الرمان =ولا تصلح البل كون في مرّح اهاليها
حلا ما حلا مرواحها تجذب الحيران = الى أقبل غروب الشمس والليل ضاويها
على بيت منهو يكرم الضيف والجيران= عشير النشامى كل ماحل طاريها
عسى من يسوق المال في غالية الأثمان= يبارك له الرحمان فيها ويذريها
أنا قلتها وادخل على الله من النسيان =مع الناس صفر وزرق ماني بناسيها
وحمر وشعل تختلف بينها الألوان =إلى تاه فيها الوصف تعرف باساميها
ترى البل تعز الرجل تكفون يالجذعان=حرامٍ عليكم تركها والطمع فيها
وصلاة ربي عد مالاح برق وبان=بسود القنوف اللي غلاظ مثانيها
على الهادي المبعوث بسنة من الرحمان = شفيع أمته لا نوديت بامر واليها[/poem]

شلعان بن ظافر الدوسري