ّّ._ تــ ــقــ ــا طـ ـيــ ــع _.

أبشر بالخير يا داعم المواهب المتدفنه




أعوذ بالله من تفكير بعض العقول
.......................... وأعوذ بالله من فكر ٍ نزل بآهله

وأعوذ بالله من شخص ٍ ما يلقى قبول
.......................... الله ما يقبله .. والناس ما تقلبه

لو إنها سالفة رغبة .. وشفّ .. وميول
.......................... يمكن نضمّه ونلقى مدخل ٍ يدخله

حنّا ترانا رياجيل ٍ نعرف الأصول
.......................... عقّيل .. والله ما حنّا بـ / اسفها واجهله

لو نضرب الأرض عرض .. ونضرب الأرض طول
.......................... ما نترك اسلومنا والمصحف نرتله

يا جامعين الدفوف وضاربين الطبول
.......................... يضرب على الكايده من يجمع المرجله

ما عاد نبغى مشاكل لين نلقى حلول
.......................... والحل موجود للي دوّر المشكله

فيما رواه البخاري من حديث الرسول
.......................... كل ٍ من الناس مجزي ٍ بحسب اعمله

والناس فيها حيا والناس فيها فضول
.......................... والمستحي مات .. واللي به فضول قتله

ما ينظف الوجه دامه من حياه مغسول
.......................... لو قلب راعيه باقي له مع الله صله

والله لو إنّي من الدنيا وأهلها ملول
.......................... أعذرت في عمري اللي ما ذخرت أشكله

من خض بحر الخليج وجاب دانه ولول
.......................... ما يقتنع لو حصا مهد الذهب فـ / اجبله

أفتح مواقع وأسجل لي خروج ودخول
.......................... مابين محجوبه اعن العرض ومفضله

من نقطة الإنطلاق أشوف خط الوصول
.......................... والوقت ريّض .. وأنا يا وقت فيّ اعجله

عشنا وشفنا وميزنا جمال الحمول
.......................... من يوم كل ٍ على الحمله يسوق اجمله

يا مطوّل السالفه يا ليتها ما تطول
.......................... ما نسمع البلبله .. يا محدث البلبله

ما صدّع ابراسك الاّ حبّة الباندول
.......................... حسبي على دارسين الطب والصيدله

بالله وش معك يالعبد الظلوم الجهول
.......................... لا تطحن الحبّه اللي تنبت السنبله

مال الطلوع ثمره .. لا صار بعده نزول
.......................... لو تبتدي فأول المشوار بالبسمله !

الأوله ناسبت .. والثانيه ويش أقول ؟
.......................... الثانيه ما تناسب راعي الأوله

واللي لسانه على قطع العلاقه عجول
.......................... حبل العلاقات يقطع فيه .. لا يوصله

الدار محكوم والشرّ مهَجور امعقول
.......................... ما فيه هوشه .. وقطع أزرّه .. وتلتله

وأنا ليا الله بلاني بالمزوح الزعول
.......................... أخفف أعيارها بالحيل وآثقّله

عشان تظهر علوم ٍ في ضميره تجول
.......................... وإن قال آبا أقول .. قلت اللي تقوله قله

مانيب خبل ٍ يزعلني كلام الخبول
.......................... واللي زعل ما علي ولا أحسب لزْعله

سفيفة ٍ والسفيفه ما تميّل ذلول
.......................... ما غير حطّه على درب النشاما شله

خلّه يجول ويصول .. ولو يجول ويصول
.......................... لا بدّ لا بدّ ما يرجع على منزله

صبرت والصبرْ مالي فيه قوّه وحول
.......................... عقب انطلق من يدي .. والله عليّ اعقله