(......... كنوز مرصوده ........)

رد الشاعر:
فهد العازمي على القصيده السابقه:
[poem=font="Simplified Arabic,5,black,bold,normal" bkcolor="transparent" bkimage="" border="none,4,gray" type=0 line=1 align=center use=sp num="0,black""]

كل ما أنسى طاري الهم واستانس وفيق=دق ناقوس الهواجيس دق التيلفون
رحت أنا وأمواج الأفكار في طق وطقيق=والروابع جات من كل شكل وكل لون
مير أنا جربت شي على حق وحقيق=لاغريب أحداث الأيام مافيها سكون
هاضني خط منمق ومضمونه يشيق=من رفيق خصني به وخص الاقربون
مرحبا ترحيبٍ أعذب من النفح الرقيق=في هوا جو تعله هماليل المزون
بالرفيق اللي جوابه ومنطوقه يليق=فيه من زين المعاني ومن زين الفنون
شاعرٍ يطمح بفكره وللجزله شفيق=من رجال فالنوايب يسدون الديون
يوم صولات الاعادي يفكون الوسيق=فعلهم يحسب حسابه لياجاء الكون كون
ينتمي لي وأنتمي له وكيف الشعر سيق=كل شارب له مقص حديد وله دهون
تشتكي لي يابن عمي وموضوعك غليق=مير تبشر وأنت تامر ويامطلق تمون
عاشق تبغى المعالي وغيرك كم عشيق=والمراجل كايده والبشر مايرحمون
أحد ياصلها واحد عاد من نص الطريق=كم وكم خطلان الايدي يروحون ويجون
والدروب معبده مابها شي يعيق=دوّر اللي معه كل النشاما يسلكون
أن بغيت الغرب عان السريع اليا المضيق=وانتبه قدمك تفاتيش كان أنك بدون!
وان بغيت الشرق خطه يمر أيسر بقيق=مايردك غير بحر الخليج وهاف مون
طق باب العز وإركن على الركن العريق=البيوت اللي تظلّلـــك شامخت الركون
ويش لك في دار يجفاك جعله في حريق=أدعله بالشر واهل الحسد يستاهلون
والمنافق لاتحطه شوير ولا لصيق=وإحذر المنة ترى أكثر عباد الله منون
زاد وزن الماء زياده على وزن الدقيق=وقتنا مجنون والناس صايبها جنون![/poem]