من متاهاتي الى ذاتي

مدري بكا حلم.. مدري ليلةٍ غبره
... ... ...نسيوني احباب والاضاعت اخباري
اهي تدبر.. اواقفت مابها دبره؟
... ... ...ليت الليالي تقدر غربة الساري
مدري من اللي من الثاني نفذ صبره؟
... ... ...لا يازمن من هو البايع من الشاري؟
لا الوجه وجهك ولا النبرة هي النبرة
... ... ...مدري.. ولكن طراك يازمن طاري
ماني بجاهل على الشدات تختبره
... ... ...تشتد ياوقت واصراري هو اصراري
بالقلب ما تعرف العبرة من العبرة
... ... ...وبناظري غيمة ما تمطر اسراري
خليت الاحزان باقصى القلب منثبرة
... ... ...ياكثر كذبي على نفسي وانا داري
قم ياقصيدٍ يعزي الا انتثر حبره
... ... ...اليا حداني زماني تفزع اشعاري
وان بار فيه رفيق كنت معتبره
... ... ...اغلى من الروح.. ما نزلت مقداري
والله لو ردهاك الحب من قبره
... ... ...مارد له لين تبرد غلتي ثاري
ماكل شق مداه السلك والابرة
... ... ...وماكل عين تجاهل جرحي العاري
اما يقولون طاح الضلع من كبره
... ... ...والا.. يقولون ماهو للوطا ضاري
كلٍ تكلم وكلٍ خابر خبره
... ... ...بكره يبين الصحيح ان سهل الباري
البارحة ضقت واثر البارحة غبرة
... ... ...مدري بكما حلم والا ضاعت اخباري؟
مساعد الرشيدي