هي لذكرى

ألد العين في وجه الزمان اللي طواه البين
واقول الله على مدت سواد الليل واكفوفه
أنا لو خاطري ضيّق مَ عبرلك بخاطر شين
لأني أحسب احساب الرجا لو ضاع معروفه
أقديها على حسن النبا واترك قضاها دين
ولا آحاتي واغض من البصر لا شفت لي شوفه
يحكمون الرجال بمنطق العاقل بصير العين
وبالانصاف يانفسي عداش اللوم منصوفه
فلا تجزع ياعيد افرح ومن عيدك بقا يومين
بعدها لك مناقيدك وانا لي دار معروفه
لو انش يالغنيمه شي مانقعد على أمرين
أخذت الحق من حينه ولحية عيد منتوفه
ولكنّش سوادٍ يكشف المنجوم والكلبين
ولا ضاعت دلايلنا وهي فالبيد مشيوفه
يحسبون الغلا هيّن وانا اقول الغلا نهرين
إذا ماجاز فالبصره تبي تلقاه فالكوفه
ولا ضاقت حدود الارض من تعداد شعب الصين
مدام ان الهوى سُره وكلٍ زاد مصروفه
يابو وجهين لا تتعب ولا تلعب على الحبلين
من اللي ينبذه قومه لو الاوضاع مكشوفه
ترى مالي خصيمٍ ترتعش يدّه ولا مسكين
ولا اصعد على راسٍ يحب القاع من خوفه
لو اتواجه تبي تاكل مع السكين لك سكين
ولكن خلها ضربه تصحي القلب في جوفه
اذا كانت تجارتكم على الخطين لام خطين
تراهي قبلكم عسفت وهي للخلق معسوفه